തിരുവനന്തപുരം: തിരുവനന്തപുരത്ത് ബലാത്സംഗ കേസിലെ അതിജീവിതയ്ക്ക് നേരെ ഭീഷണി മുഴക്കി പ്രതിയുടെ സഹോദരൻ. പീഡന ദൃശ്യങ്ങൾ പുറത്തുവിടുമെന്നാണ് ഭീഷണിപ്പെടുത്തിയതെന്ന് അതിജീവിത പറയുന്നു. പ്രതിയുടെ സഹോദരനായ ഡോക്ടറാണ് ഭീഷണിപ്പെടുത്തിയത്. ഇതിനിടെതിരെ വനിതാ കമ്മീഷനെ സമീപിക്കുമെന്ന് അവർ വ്യക്തമാക്കി.
യുവതിയെ പീഡിപ്പിച്ച കേസിലെ പ്രതി പന്തളം സ്വദേശി ഡോ. അരുൺ ബാബുവാണ്. ഇയാളെ പിടികൂടാൻ പോലീസിന് ഇതുവരെ സാധിച്ചിട്ടില്ല. 2021 ഡിസംബർ 25 ന് തിരുവനന്തപുരത്ത് വച്ചാണ് ബലാത്സംഗം നടന്നത്. വിവാഹ വാഗ്ദാനം നൽകിയായിരുന്നു പ്രതി അതിജീവിതയെ പീഡിപ്പിച്ചത്. സംഭവത്തിൽ പരാതി നൽകിയ പെൺകുട്ടിയുടെ മൊഴി പ്രകാരം പീഡനം നടന്നത് ആക്കുളം ടെക്കി സ്റ്റേ അപ്പാർട്ട്‌മെന്റിൽ വച്ചാണ്.
വിവാഹത്തിന് മുന്നോടിയായി മാതാപിതാക്കളെ പരിചയപ്പെടുത്താനെന്ന് പറഞ്ഞ് വിളിച്ചുവരുത്തിയായിരുന്നു പ്രതി യുവതിയെ പീഡനത്തിന് ഇരയാക്കിയത്. പിന്നീട് പലയിടങ്ങളിലേക്ക് വിളിച്ചുവെന്നും യുവതി ആരോപിക്കുന്നു. ഈ കേസിൽ പരാതി നൽകിയതിന് പിന്നാലെയാണ് പ്രതിയുടെ സഹോദരൻ ഭീഷണി മുഴക്കിയിരിക്കുന്നത്.