ജലന്തര്‍: സ്‌കൂള്‍ യൂണിഫോമില്‍ മീന്‍ വിറ്റ് വൈറലായ പെണ്‍കുട്ടിയാണ് ഹനാന്‍. ഇപ്പോഴിതാ ട്രെയിന്‍ യാത്രയ്ക്കിടയിലുണ്ടായ ദുരനുഭവം പങ്കുവച്ചിരിക്കുകയാണ് ഹനാന്‍. യാത്രയ്ക്കിടയില്‍ മദ്യലഹരിയിലുള്ള യാത്രക്കാര്‍ അപമര്യാദയായി പെരുമാറിയെന്നും തന്നെ ആക്രമിക്കാന്‍ ശ്രമിച്ചുവെന്നുമാണ് ഹനാന്‍ പറയുന്നത്.
ഒരാള്‍ യാത്രയ്ക്കിടെ ശരീരത്തില്‍ കടന്നുപിടിച്ചെന്നും ട്രെയിനില്‍ ഒരു സംഘം പരസ്യമായി മദ്യപിച്ചതു വീഡിയോയില്‍ പകര്‍ത്തിയപ്പോള്‍ തന്നോട് അപമര്യാദയായി പെരുമാറിയെന്നും ഹനാന്‍ പറയുന്നു. കൂടാതെ സംഭവം അറിഞ്ഞെത്തിയ പോലീസ് മോശമായി പെരുമാറിയെന്നും അവര്‍ ആരോപിക്കുന്നു.
ജലന്തറില്‍ ഒരു പരീക്ഷ എഴുതാന്‍ പോകുന്ന വഴിക്കാണ് ഹനാന്‍ ദുരനുഭവം ഉണ്ടായത്. ഹനാന്റെ വീഡിയോ ശ്രദ്ധയില്‍പ്പെട്ടാണ് പോലീസ് എത്തിയത്. അക്രമികളെ കസ്റ്റഡിയിലെടുക്കുന്നതിന് പകരം തന്നോട് ട്രെയിനില്‍ നിന്ന് ഇറങ്ങാനാണ് പോലീസ് ആവശ്യപ്പെട്ടതെന്നും ഹനാന്‍ ആരോപിക്കുന്നു.
