വടകര : വടകര സബ് ജയിലിൽ നിന്ന് ചാടി പോയ പ്രതി സ്റ്റേഷനിലെത്തി കീഴടങ്ങി. താമരശേരി സ്വദേശി ഫഹദാണ് സ്വയം കീഴടങ്ങിയത്. എട്ട്മാസം പ്രായമുള്ള തന്റെ മകനെ കാണാനുള്ള ആഗ്രഹത്താലാണ് ജയിൽ ചാടിയതെന്ന് ഫഹദ് പോലീസിനോട് പറഞ്ഞു.
എന്നാൽ പോലീസ് അന്വേഷണം ഊർജിതപ്പെടുത്തിയതോടെ സ്വയം കീഴടങ്ങിയെന്നാണ് പൊലീസ് കരുതുന്നത്. ജൂൺ ഏഴിന് അഴിയൂർ ചെക്‌പോസ്റ്റിൽ നിന്ന് ആറു കിലോ കഞ്ചാവുമായാണ് ഫഹദ് പോലീസിന്റെ പിടിയിലായത്. ഇയാൾ അന്നു മുതൽ റിമാന്റിൽ കഴിയുകയായിരുന്നു.
രണ്ട് ദിവസം മുൻപാണ് വടകര സബ് ജയിലിൽ നിന്ന് ഫഹദ് ബാത്‌റൂമിലെ വെന്റിലേറ്റർ വഴി രക്ഷപെട്ടത്. അന്ന് മുതൽ പോലീസ് അന്വേഷണം ഊർജിതപ്പെടുത്തിയിരുന്നു. സമീപ പ്രദേശത്തെ സിസി ടിവി ദൃശ്യങ്ങൾ പരിശോധിച്ചു. വീടിനു പരിസരത്തും സുഹൃത്തുക്കളെ കേന്ദ്രീകരിച്ചും അന്വേഷണം നടത്തിയിരുന്നു. ഇതിനിടെയാണ് ഇന്ന് രാവിലെ ഫഹദ് സ്റ്റേഷനിൽ കീഴടങ്ങിയത്.