കൊച്ചി: എറണാകുളത്ത് കൊവിഡ് ചികിത്സയിലിരുന്ന വൃദ്ധ മരിച്ചു. കൊവിഡ് ബാധിച്ച് എറണാകുളം കളമശ്ശേരി മെഡിക്കല്‍ കോളേജില്‍ ചികിത്സയിലായിരുന്ന ആലുവ സ്വദേശിയാണ് മരിച്ചത്. ആലുവ കടുങ്ങല്ലൂര്‍ കാമിയമ്പാട്ട് ലീലാമണിയമ്മയാണ് മരിച്ചത്. 71 വയസായിരുന്നു. ന്യൂമോണിയ ബാധിച്ചതിനെ തുടര്‍ന്ന് ഐസിയുവില്‍ ചികിത്സയിലിരിക്കെ ഇന്ന് രാവിലെയായിരുന്നു മരണം.
ലീലാമണിയമ്മക്ക് രക്തസമ്മര്‍ദ്ദം, പ്രമേഹം, ഹൃദ്രോഗം, കടുത്ത ശ്വാസകോശ രോഗങ്ങള്‍ എന്നിവയുണ്ടായിരുന്നു. അതേസമയം മരണം കൊവിഡ് മൂലമാണെന്ന് സ്ഥിരീകരിക്കുന്നതിനായി ഇവരുടെ സ്രവം ആലപ്പുഴ എന്‍ ഐ വി ലാബിലേക്കയച്ചു.
എറണാകുളം ജില്ലയില്‍ കൊവിഡ് സമ്പര്‍ക്ക വ്യാപനം രൂക്ഷമായി തുടരുകയാണ്. ഇന്നലെ രോഗം സ്ഥിരീകരിച്ച 54 പേരില്‍ 48 പേര്‍ക്കും സമ്പര്‍ക്കത്തിലൂടെയാണ് കൊവിഡ് ബാധയുണ്ടായത്. പശ്ചിമ കൊച്ചിയില്‍ രോഗവ്യാപനം രൂക്ഷമായി തുടരുകയാണ്. ഫോര്‍ട്ട്‌കൊച്ചി ക്ലസ്റ്ററില്‍ 20 പേര്‍ക്കും ചെല്ലാനത്ത് 3 പേര്‍ക്കും കൊവിഡ് സ്ഥിരീകരിച്ചു. നിലവില്‍ 1158 പേരാണ് ജില്ലയില്‍ കൊവിഡ് സ്ഥിരീകരിച്ച് ചികിത്സയിലുള്ളത്.