കൊച്ചി: ലോക്ക്ഡൗണ് പിന്വലിച്ചാലും എറണാകുളം ജില്ലയില് നിയന്ത്രണങ്ങള് തുടരുമെന്ന് മന്ത്രി വിഎസ് സുനില്കുമാര്. കൊവിഡ് പ്രതിരോധ പ്രവര്ത്തനങ്ങള് സംബന്ധിച്ച വാര്ത്താസമ്മേളനത്തിലാണ് ഇക്കാര്യം വ്യക്തമാക്കിയത്. കൂടാതെ ജനജീവിതം ഉടനെ സാധാരണ നിലയിലേക്ക് എത്തുമെന്ന പ്രചരണം ശരിയല്ലെന്നും അദ്ദേഹം പറയുന്നു.
കേന്ദ്ര, സംസ്ഥാന സര്ക്കാരുകളുടെ നിര്ദേശങ്ങള്ക്ക് അനുസരിച്ചു കൊവിഡ് പ്രതിരോധ നിബന്ധനകള് പാലിച്ചു കൊണ്ട് മാത്രമേ ഇളവുകള് നല്കൂ. അന്തര്ജില്ലാ യാത്രകള്ക്കും പൊതുഗതാഗത സംവിധാനത്തിനും ജില്ലയില് നിയന്ത്രണം ഉണ്ടാകുമെന്നും മന്ത്രി കൂട്ടിച്ചേര്ത്തു.
നിലവില് ജില്ലയില് മട്ടാഞ്ചേരിയിലെ ചുള്ളിക്കല് പ്രദേശമാണ് ആരോഗ്യ വകുപ്പ് ഹോട്സ്പോട്ട് ആയി കണ്ടെത്തിയിട്ടുള്ളത്. ലോക്ക് ഡൗണ് പിന്വലിച്ചാലും ഇവിടെ കാര്യങ്ങള് നിരീക്ഷിച്ച ശേഷം മാത്രമേ ഇളവുകള് അനുവദിക്കൂ എന്നും മന്ത്രി വ്യക്തമാക്കി.