കൊച്ചി: കൊച്ചിയില്‍ അയല്‍ വീട്ടില്‍ യുവാവിനെ മരിച്ച നിലയില്‍ കണ്ടെത്തിയ സംഭവത്തില്‍ കൊലപാതകം നടത്തിയത് താനാണെന്ന് കസ്റ്റഡിയിലെടുത്ത സജീവന്‍ പോലീസില്‍ മൊഴി നല്‍കി. മദ്യ കുപ്പിയെ ചൊല്ലിയുള്ള തര്‍ക്കമാണ് കൊലപാതകത്തിന് കാരണമെന്ന് സജീവന്‍ പോലീസിനോട് പറഞ്ഞു. ഇരുവരും ഒരിമിച്ച് വാങ്ങിയ മദ്യം പ്രസാദ് ഒറ്റയ്ക്ക് കുടിച്ച് തീര്‍ത്തതാണ് പ്രശ്‌നങ്ങള്‍ളുടെ തുടക്കം.
തുടര്‍ന്ന് ഇരുവരും വാക്കേറ്റത്തിലേര്‍പ്പെട്ടു. തുടര്‍ന്ന് നിയന്ത്രണം വിട്ട് സജീവന്‍ എയര്‍ ഗണ്‍ കൊണ്ട് പ്രസാദിന്റെ തലയ്ക്ക് പിന്നില്‍ അടിക്കുകയായിരുന്നു. അടിയുടെ ആഘാതത്തില്‍ പ്രസാദ് സംഭവ സ്ഥലത്ത് വെച്ച് തന്നെ മരിച്ചു.
ഇന്നലെ രാവിലെയാണ് അയല്‍വാസിയായ കാക്കൂച്ചിറ സജീവന്റെ വീടിന്റെ ടെറസില്‍ പ്രസാദിനെ മരിച്ച നിലയില്‍ കണ്ടെത്തിയത്. പ്രസാദിന്റെ മൃതശരീരത്തിനടുത്ത് നിന്ന് തന്നെ എയര്‍ഗണും കണ്ടെത്തിയിരുന്നു. ഇത് തകര്‍ന്ന നിലയിലുമായിരുന്നു. മരിച്ച പ്രസാദിന്റെ വസ്ത്രങ്ങള്‍ വലിച്ചു കീറിയ നിലയിലുമായിരുന്നു.