കോഴിക്കോട്: കുരുവട്ടൂരില്‍ വീട് കയറി മര്‍ദ്ദിച്ചെന്ന് പരാതി. സംഭവത്തില്‍ ബിഎസ്എഫ് ജവാനും അമ്മയ്ക്കും പരിക്ക്. കുരുവട്ടൂര്‍ എടക്കിനാര്‍ബത്ത് വീട്ടില്‍ ഇ റിനീഷ് കുമാര്‍, മാതാവ് ഇ ശ്രീമതി എന്നിവര്‍ക്കാണ് മര്‍ദ്ദനമേറ്റത്. ഇരുവരും ബീച്ച് ആശുപത്രിയില്‍ ചികിത്സയിലാണ്.
രാത്രി ഒരു മണിയോടെ നാലംഗ സംഘം വീട്ടില്‍ അതിക്രമിച്ച് കയറി ഇവരെ മര്‍ദ്ദിക്കുകയായിരുന്നു. അയല്‍ക്കാരനായ എആര്‍ ക്യാമ്പിലെ പോലീസുകാരനും കൂട്ടുകാരുമാണ് ഇതിന് പിന്നിലെന്ന് ബന്ധുക്കള്‍ പറഞ്ഞു. മദ്യലഹരിയിലായിരുന്നു സംഘമെന്നാണ് ആരോപണം.
റിനീഷിന് മുഖത്തും വാരിയെല്ലിനും പരിക്കുണ്ട്. അമ്മയ്ക്ക് നാഭിക്കും കഴുത്തിനും പരിക്കുണ്ട്. പട്ടികജാതിക്കാരനായ റിനീഷ് കുമാര്‍ 17 വര്‍ഷമായി ബിഎസ്എഫില്‍ ജോലി ചെയ്യുന്നു. ഒരുമാസം മുമ്പാണ് അവധിക്ക് വന്നത്. അടുത്ത മാസം തിരികെ ജോലിയില്‍ പ്രവേശിക്കാന്‍ ഇരിക്കെയാണ് സംഭവം.