ഭോപ്പാല്: കേന്ദ്ര ആഭ്യന്തരമന്ത്രി അമിത് ഷായ്ക്ക് വധഭീഷണി. മധ്യപ്രദേശിലെ ബിജെപി എംഎല്എ ലീന ജെയ്നാണ് ഭീഷണികത്ത് ലഭിച്ചതായി അറിയിച്ചത്.
അമിത് ഷാ ഗഞ്ച്ബസോഡ പട്ടണത്തില് വന്നാല് ബോംബ് സ്ഫോടനം നടത്തി വധിക്കുമെന്ന് ഭീഷണിക്കത്തില് പറയുന്നുണ്ടെന്ന് അവര് പറഞ്ഞു. തനിക്ക് നേരെയും വധഭീഷണിയുണ്ടെന്നും എംഎല്എ വ്യക്തമാക്കി. കത്തില് പേരോ ഒപ്പോ ഉണ്ടായിരുന്നില്ല. ഇത് സംബന്ധിച്ച് പോലീസില് പരാതി നല്കിയിട്ടുണ്ട്.
പരാതി ലഭിച്ചിട്ടുണ്ടെന്നും അന്വേഷിക്കുമെന്നും വിദിഷ എസ്പി വിനായക് വെര്മ വാര്ത്താ ഏജന്സി പിടിഐയോട് പറഞ്ഞു. ബസ് സ്റ്റാന്റിലും റെയില്വേ സ്റ്റേഷനിലും സര്ക്കാര് ആശുപത്രികളിലും സ്ഫോടനം നടത്തുമെന്നും ഭീഷണിയുണ്ടെന്നും അദ്ദേഹം പറഞ്ഞു. പരാതിയെ തുടര്ന്ന് നഗരത്തില് സുരക്ഷ വര്ധിപ്പിച്ചു. ഭോപ്പാലില് നിന്ന് ബോംബ് സ്ക്വാഡിനെ വരുത്തിയിട്ടുണ്ടെന്നും എസ്പി വ്യക്തമാക്കി.