ബംഗളൂരു: കോണ്‍ഗ്രസ് പ്രസിഡന്റായി രാഹുല്‍ ഗാന്ധി തുടരണമെന്ന് കര്‍ണാടക മുന്‍മുഖ്യമന്ത്രിയും കോണ്‍ഗ്രസ് നേതാവുമായി സിദ്ധരാമയ്യ. പാര്‍ട്ടിക്ക് രാഹുലിന്റെ നേതൃത്വം ആവശ്യമുള്ള സമയമാണിത്. അദ്ദേഹം പ്രസിഡന്റ് സ്ഥാനത്ത് തുടരുമെന്നാണ് പ്രതീക്ഷയെന്നും സിദ്ധരാമയ്യ കൂട്ടിച്ചേര്‍ത്തു.
മോഡി ഭരണത്തില്‍ തൊഴിലില്ലായ്മ കുത്തനെ വര്‍ധിച്ചു. രൂപയുടെ മൂല്യം ഇടിഞ്ഞു. അഞ്ച് വര്‍ഷം കൊണ്ട് മോഡി ഇന്ത്യന്‍ സാമ്പത്തികാവസ്ഥ തകര്‍ത്തിട്ടും, ജനം വീണ്ടും മോഡിയെ തെരഞ്ഞെടുത്തത് തന്നെ അത്ഭുതപ്പെടുത്തുന്നതായും സിദ്ധരാമയ്യ പറഞ്ഞു. രണ്ടാം മോഡി ഗവണ്‍മെന്റിനും സാമ്പത്തികാവസ്ഥ മെച്ചപ്പെടുത്താന്‍ സാധിക്കുമെന്ന് തോന്നുന്നില്ലെന്നും സിദ്ധരാമയ്യ വ്യക്തമാക്കി.
ബിജെപി നേതാക്കളുടെ ‘നാടക’ത്തിലും കള്ളങ്ങളിലും ജനം വീണു. തെരഞ്ഞെടുപ്പ് പ്രചാരണത്തില്‍ ബിജെപി നേതാക്കള്‍ നിരന്തരം കള്ളങ്ങള്‍ പ്രചരിപ്പിക്കുകയും മതവികാരം ഇളക്കിവിടുകയും ചെയ്‌തെന്നും സിദ്ധരാമയ്യ വിമര്‍ശിച്ചു.
പുല്‍വാമ ആക്രമണത്തെയും സിദ്ധരാമയ്യ വിമര്‍ശിച്ചു. ഇന്റലിജന്റസ് വീഴ്ചയായിരുന്നു പുല്‍വാമ ആക്രമണം. ദേശീയസുരക്ഷയില്‍ അലംഭാവം കാണിച്ചു. അവരുടെ വീഴ്ചയെ ചോദ്യം ചെയ്യാന്‍ നമുക്ക് അവകാശമുണ്ട്. ഈ രാജ്യത്തെ പൗരനായി ജീവിക്കുന്നിടത്തോളം കാലം അവരുടെ വീഴ്ചകളോ ചോദ്യം ചെയ്യുമെന്നും അദ്ദേഹം പറഞ്ഞു