സൂറത്ത്: സുഹൃത്തിന് ഭാര്യയുമായി രഹസ്യബന്ധം ആരോപിച്ച് കൊല നടത്തിയ യുവാവിന് സുഹൃത്തിന്റെ കൈ കൊണ്ട് ദാരുണമരണം. ഭാര്യയുടെ രഹസ്യബന്ധത്തെ ചൊല്ലിയാണ് തർക്കത്തിനിടെ യുവാവ് ഭാര്യയെ കൊലപ്പെടുക്കിയത്. തൊട്ടുപിന്നാലെ യുവാവിനെ സുഹൃത്തും കൊല ചെയ്യുകയായിരുന്നു. ഗുജറാത്തിലെ സൂറത്തിലാണ് നടുക്കുന്ന ഇരട്ടക്കൊലപാതകം നടന്നത്.
സൂറത്തിലെ ചൗക്ക് ബസാറിൽ താമസിക്കുന്ന കൗശിക് റാവത്ത്(21) ഭാര്യ കൽപ്പന റാവത്ത്(18) എന്നിവരാണ് കൊല്ലപ്പെട്ടത്. സംഭവത്തിൽ അക്ഷയ് കടാര(21) എന്നയാളെ പോലീസ് അറസ്റ്റ് ചെയ്തിട്ടുണ്ട്. കൗശിക് റാവത്ത് ആദ്യം ഭാര്യ കൽപനയെ അക്ഷയുമായുള്ള ബന്ധം ആരോപിച്ച് കൊലപ്പെടുത്തുകയായിരുന്നു. ഇതിനുപിന്നാലെയാണ് കൗശിക്കിനെ അക്ഷയ് കൊലപ്പെടുത്തിയതെന്നും പോലീസ് പറഞ്ഞു.
കൗശിക്കും അറസ്റ്റിലായ അക്ഷയ് കടാരയും സുഹൃത്തുക്കളാണ്. അടുത്തിടെ അക്ഷയ് കടാരയുടെ ഭാര്യയും കൗശിക്കും അടുപ്പത്തിലായെന്നാണ് കൗശിക് ആരോപിച്ചിരുന്നത്. ഇവരുടെ രഹസ്യബന്ധം അറിഞ്ഞ കൗശിക്കിന്റെ ഭാര്യ കൽപ്പനയും അക്ഷയും ഈ ബന്ധത്തെ എതിർത്ത് സംസാരിക്കുകയും ഞായറാഴ്ച രാത്രി ഇരുവരും തമ്മിൽ ഇതേച്ചൊല്ലി വഴക്കുണ്ടാവുകയും ചെയ്തു.
ഇതിനിടെയാണ് കൗശിക്ക് ഭാര്യയെ കഴുത്ത് ഞെരിച്ച് കൊലപ്പെടുത്തിയത്. ഭാര്യയെ കൊലപ്പെടുത്തിയശേഷം സുഹൃത്തായ അക്ഷയുടെ സഹായത്തോടെയാണ് കൗശിക് മൃതദേഹം ഉപേക്ഷിച്ചതും. മൃതദേഹം നദീതീരത്തെ വിജനമായപ്രദേശത്ത് ഉപേക്ഷിച്ചക്കുകയായിരുന്നു. തുടർന്ന് ഇവിടെനിന്ന് മടങ്ങുന്നതിനിടെയാണ് സുഹൃത്തിനെ അക്ഷയ് കൊലപ്പെടുത്തിയതെന്നും പോലീസ് പറഞ്ഞു.
സംഭവത്തിന് ശേഷം രക്ഷപ്പെട്ട അക്ഷയ് കടാരയെ ദാഹോദ് ബസ് സ്റ്റാൻഡിൽനിന്നാണ് ചൗക്ക് ബസാർ പോലീസും ക്രൈംബ്രാഞ്ചും കസ്റ്റഡിയിലെടുത്തത്.