ചെന്നൈ: സുഹൃത്തുക്കള്‍ക്കൊപ്പം ന്യൂയര്‍ ആഘോഷത്തിനിടെ പാമ്പ് കടിയേറ്റ യുവാവ് മരിച്ചു. മണികണ്ഠന്‍ എന്ന യുവാവാണ് മരിച്ചത്. കടലൂരില്‍ ശനിയാഴ്ച രാത്രിയായിരുന്നു സംഭവം.
സുഹൃത്തിനൊപ്പം ന്യൂയര്‍ ആഘോഷിക്കുന്നതിനിടെയാണ് പാമ്പ് ഇഴഞ്ഞുവന്നത്. പാമ്പിനെ കണ്ടതും മദ്യലഹരിയിലായിരുന്ന യുവാവ് പുതുവത്സര സമ്മാനമാണെന്ന് പറഞ്ഞ് അതിനെ കൈയിലെടുക്കുകയും നാട്ടുകാര്‍ക്ക് നേരെ വീശിക്കാണിക്കുകയും ചെയ്തു. പാമ്പുമായി കളിക്കുന്നത് സുഹൃത്തുക്കള്‍ വിലക്കിയെങ്കിലും ഇയാള്‍ കേട്ടില്ല.
തുടര്‍ന്ന് പാമ്പ് കടിച്ചതോടെ യുവാവ് കുഴഞ്ഞുവീഴുകയായിരുന്നു. ഉടന്‍ തന്നെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. കടിച്ച പാമ്പിനെ സഞ്ചിയിലാക്കി ആശുപത്രിയിലെത്തിച്ചിരുന്നു. ആശുപത്രിയില്‍ വച്ച് സഞ്ചി തുറന്നപ്പോള്‍ സുഹൃത്തിനും കടിയേറ്റു. ഇയാള്‍ ഇപ്പോള്‍ ചികിത്സയിലാണ്.