ന്യൂഡൽഹി: ഇന്ത്യയുടെ മണ്ണ് ചൈന കൈവശപ്പെടുത്തിയെന്ന് കോൺഗ്രസ് എംപി രാഹുൽ ഗാന്ധി. ഇന്ത്യൻ ഭൂപ്രദേശത്തേക്ക് ചൈന കടന്നുകയറിയിട്ടുണ്ടെന്നത് വളരെ വ്യക്തമാണ്. അത് തന്നെ അസ്വസ്ഥമാക്കുകയും രക്തം തിളപ്പിക്കുകയും ചെയ്യുന്നതായുംട്വിറ്ററിൽ പോസ്റ്റ് ചെയ്ത വീഡിയോയിൽ രാഹുൽ പറയുന്നു.
ചൈനീസ് കടന്നുകയറ്റം സംബന്ധിച്ച നിരീക്ഷണം ട്വിറ്ററിലൂടെ പങ്കുവെയ്ക്കുകയായിരുന്നു രാഹുൽ ഗാന്ധി. ഇന്ത്യക്കാരനെന്ന നിലയിൽ തന്റെ ഏറ്റവും വലിയ മുൻഗണന രാജ്യവും ജനതയുമാണ്. എങ്ങനെ മറ്റൊരു രാഷ്ട്രത്തിന് നമ്മുടെ രാജ്യത്തേക്ക് കടക്കാൻ സാധിക്കും. താൻ ഉപഗ്രഹ ചിത്രങ്ങൾ കണ്ട് ബോധ്യപ്പെട്ടതാണ്. മുൻസൈനികോദ്യോഗസ്ഥരുമായി സംസാരിക്കുകയും ചെയ്‌തെന്ന് രാഹുൽ വിശദീകരിക്കുന്നു.
ചൈന ഇന്ത്യയിലേക്ക് കടന്നിട്ടില്ലെന്ന് താൻ കള്ളം പറയണമെന്നാണോ നിങ്ങൾ ആഗ്രഹിക്കുന്നതെന്നു ചോദിച്ച രാഹുൽ ഞാൻ കള്ളം പറയില്ല. ഒരുപക്ഷേ തന്റെ രാഷ്ട്രീയ ജീവിതം പൂർണമായും തകർന്നേക്കാമെങ്കിലും ഇന്ത്യൻ ഭൂപ്രദേശത്തെ കുറിച്ച് സത്യമേ പറയൂവെന്നും രാഹുൽ ഗാന്ധി പറഞ്ഞു.
എന്റെ കരിയർ നശിച്ചേക്കാം, എങ്കിലും ഞാൻ കള്ളം പറയാനില്ല. നമ്മുടെ രാജ്യത്തേക്കുള്ള ചൈനയുടെ കടന്നുകയറ്റത്തെ കുറിച്ച് കള്ളം പറയുകയും അതിന് അവരെ അനുവദിക്കുകയും ചെയ്യുന്നവർ രാജ്യദ്രോഹികളാണെന്നും ചൈന ഇന്ത്യയിലേക്ക് കടന്നിട്ടില്ലെന്ന് കള്ളം പറയുന്നവർ രാജ്യസ്‌നേഹികളല്ലെന്നും രാഹുൽ അഭിപ്രായപ്പെട്ടു.