ന്യൂഡല്‍ഹി: ബോളിവുഡ് താരങ്ങളില്‍ ചിലര്‍ക്ക് പാക് ചാരസംഘടനയായ ഐഎസ്ഐയുമായി ബന്ധമുണ്ടെന്ന ആരോപണവുമായി ബിജെപി നേതാവ് രംഗത്ത്. പാര്‍ട്ടി ദേശീയ വൈസ്പ്രസിഡന്റും വക്താവുമായ ബൈജയന്ത് ജയ് പാണ്ഡയാണ് ആരോപണവുമായി രംഗത്ത് എത്തിയിരിക്കുന്നത്.
ജമ്മുകാശ്മീരില്‍ കലാപം ഉണ്ടാക്കുന്നതില്‍ പങ്കുണ്ടെന്ന് കണക്കാക്കുന്ന ചില പാകിസ്താനികളുമായും എന്‍ആര്‍ഐകളുമായും ബോളിവുഡിലെ ചിലര്‍ക്ക് വ്യക്തിബന്ധങ്ങളും ബിസിനസ് ബന്ധങ്ങളുമുണ്ട്. കൂടാതെ ചിലര്‍ക്ക് ഐഎസ്‌ഐയുമായും പാക് സൈന്യവുമായും ബന്ധമുണ്ടെന്നും ബൈജയന്ത് പാണ്ഡ പറഞ്ഞു.
താന്‍ പറഞ്ഞത് കളവല്ലെന്നും തന്റെ വാദങ്ങളെല്ലാം തെളിയിക്കാന്‍ തക്ക തെളിവുകള്‍ കൈവശമുണ്ടെന്നും ബിജെപി നേതാവ് കൂട്ടിച്ചേര്‍ത്തു. ബോളിവുഡിലെ ദേശസ്‌നേഹികള്‍ ഇത്തരക്കാരെ കരുതിയിരിക്കണമെന്നും ഇവരെ അവഗണിക്കാന്‍ തയ്യാറാകണമെന്നും ബൈജയന്ത് പാണ്ഡ ആവശ്യപ്പെട്ടു.
അടുത്തിടെയായി ബോളിവുഡിനെതിരെ ഗുരുതര ആരോപണങ്ങളാണ് ഉയരുന്നത്. സുശാന്ത് സിങ് രജപുത്തിന്റെ മരണത്തെ തുടര്‍ന്ന് ബോളിവുഡിലെ ചില പ്രമുഖര്‍ക്കെതിരെ ഒരുവിഭാഗം രംഗത്ത് വന്നിരുന്നു. സ്വജനപക്ഷപാതം, ലോബിയിങ് തുടങ്ങിയ ആരോപണങ്ങളാണ് ഇങ്ങനെ ഉയര്‍ന്നത്.
ഇതിനിടെയാണ് ബോളിവുഡിലെ ചില താരങ്ങള്‍ക്ക് പാക് ബന്ധമുണ്ടെന്ന് ആരോപിച്ച് ബിജെപി നേതാവ് രംഗത്തെത്തിയത്. ട്വിറ്ററിലൂടെയാണ് ബൈജയന്ത് ജയ് പാണ്ഡ ഇക്കാര്യം പറഞ്ഞത്.