കോഴഞ്ചേരി: ആറന്മുളയിലേക്കുള്ള ബസിന് പകരം പത്തനംതിട്ടയിലേക്കുള്ള ബസ് മാറിക്കയറിയ ഏഴാം ക്ലാസുകാരിയെ സുരക്ഷിതയായി പിതാവിന്റെ കൈകളില്‍ ഏല്‍പ്പിച്ച് മാതൃകയായി ഈ കണ്ടക്ടര്‍. പാഴൂര്‍ മോട്ടോഴ്‌സിലെ കണ്ടക്ടറാണ് കുട്ടി ബസ് മാറി കയറിയതാണെന്ന് മനസിലാക്കി കുട്ടിക്കൊപ്പം ബസില്‍ നിന്നും ഇറങ്ങി ബന്ധുക്കളെ വിവരമറിയിച്ചത്. പിന്നീട് കുട്ടിയുടെ പിതാവ് സ്ഥലത്തെത്തി വീട്ടിലേക്ക് കൊണ്ടുപോവുകയായിരുന്നു. കുട്ടിയെ താനെത്തുന്നത് വരെ സംരക്ഷിക്കുകയും കൂട്ടിരിക്കുകയും ചെയ്ത കണ്ടക്ടറോട് നന്ദി പറഞ്ഞ് ഫേസ്ബുക്കില്‍ കുട്ടിയുടെ പിതാവ് കുറിച്ച കുറിപ്പ് വൈറലാവുകയാണ്. നഷ്ടപ്പെട്ടെന്ന് കരുതിയ മകളെ തിരികെ ഏല്‍പ്പിച്ച കണ്ടക്ടറോട് എത്ര നന്ദി പറഞ്ഞാലും മതിയാവില്ലെന്ന് കുട്ടിയുടെ പിതാവ് സന്തോഷ് കുര്യന്‍ ഫേസ്ബുക്കില്‍ കുറിക്കുന്നു.
ഇന്നെനിക്ക് മറക്കാനാകാത്ത ദിനം…എന്ന് തുടങ്ങുന്ന ഹൃദയസ്പര്‍ശിയായ കുറിപ്പ് കുട്ടിയുടെ അച്ഛനായ സന്തോഷ് കുര്യനാണ് പങ്കുവെച്ചത്. ‘പ്രിയ സുഹൃത്തേ നന്ദി,, പ്രിയ സന്തോഷിനും സഹപ്രവര്‍ത്തകര്‍ക്കും എന്റെയും എന്റെ കുടുംബത്തിന്റെയും പ്രാര്‍ത്ഥനകള്‍…. നിങ്ങളുടെ നല്ല മനസ്സിന് ദൈവം പ്രതിഫലം തരട്ടെ എന്നു മാത്രം പ്രാര്‍ത്ഥിക്കുന്നു…’-സന്തോഷ് കുര്യന്‍ കുറിച്ചു.
സന്തോഷ് കുര്യന്റെ ഫേസ്ബുക്ക് കുറിപ്പിന്റെ പൂര്‍ണ്ണരൂപം:
ഇന്നെനിക്ക് മറക്കാത്ത ദിനം…
പാഴൂര്‍ മോട്ടേഴ്‌സിനും അതിലെ ജീവനക്കാര്‍ക്കും എന്റെ ഹൃദയത്തില്‍ നിന്നും ഒരായിരം നന്ദിയുടെ പൂച്ചെണ്ടുകള്‍…
കോഴഞ്ചേരിയില്‍ നിന്നും ചെങ്ങന്നൂര്‍ ബസില്‍ കയറി ആറന്മുളയില്‍ ഇറങ്ങേണ്ട, 7th ല്‍ പഠിക്കുന്ന എന്റെ മകള്‍ ഇന്ന് ബസ് തെറ്റി പത്തനംതിട്ടക്ക് പോയ പാഴൂര്‍ ബസില്‍ കയറുകയും ഇലന്തൂര്‍ എത്തിയപ്പോള്‍ അതിലെ കണ്ടക്ടര്‍ എവിടെ പോകാനാണെന്ന് തിരക്കിയപ്പോള്‍ ആറന്മുളക്കാണെന്ന് മോള്‍ പറഞ്ഞപ്പോള്‍ അതിലെ കണ്ടക്ടര്‍ സന്തോഷ് എന്നയാള്‍ മോളെയും കൊണ്ട് അവിടെ ഇറങ്ങുകയും തന്റെ ഫോണില്‍ നിന്നും മോളെക്കൊണ്ട് എന്നെ വിളിപ്പിച്ച് വിവരം അറിയിക്കുകയും ചെയ്തു.തുടര്‍ന്ന് കോഴഞ്ചേരിയില്‍ നിന്നും ഞാന്‍ ഇലന്തൂര്‍ എത്തുന്നതു വരെ മകളെയും കൊണ്ട് ഇലന്തൂരെ വെയ്റ്റിംഗ് ഷെഡില്‍ കാത്തിരുന്ന് സുരക്ഷിതമായി മകളെ എന്നെ ഏല്പിച്ചിട്ടാണ് സന്തോഷ് എന്ന ആ നല്ല മനുഷ്യന്‍ യാത്രയായത്….
സാധാരണ ഇത്തരം സാഹചര്യങ്ങളില്‍ സ്റ്റോപ്പില്‍ ഇറക്കുകയോ,, മറ്റാരെയെങ്കിലും പറഞ്ഞ് ഏല്പിച്ച് തങ്ങളുടെ ട്രിപ്പ് തുടരുകയാണ് പതിവ്… എന്നാല്‍ അതില്‍ നിന്നും വ്യത്യസ്ഥമായി ബസ് പറഞ്ഞു വിട്ടിട്ട് എന്റെ മകളേയും കൊണ്ട് എന്നെ കാത്തിരുന്ന ആ പ്രിയ സുഹൃത്തിനോട് അപ്പോഴത്തെ പ്രത്യേക മാനസികാവസ്ഥയില്‍ നല്ല ഒരു നന്ദി വാക്കുപറയുവാന്‍ എനിക്ക് കഴിഞ്ഞില്ല… പിന്നീട് ഫോണില്‍ വിളിച്ച് നന്ദി പറഞ്ഞപ്പോള്‍ ആ മനുഷ്യന്‍ എന്നോട് പറഞ്ഞത് എനിക്കും ഒരു മകളുണ്ട്,,, അത്രയേ ചിന്തിച്ചുള്ളൂ എന്നാണ്… പ്രിയ സുഹൃത്തേ നന്ദി,, പ്രിയ സന്തോഷിനും സഹപ്രവര്‍ത്തകര്‍ക്കും എന്റെയും എന്റെ കുടുംബത്തിന്റെയും പ്രാര്‍ത്ഥനകള്‍…. നിങ്ങളുടെ നല്ല മനസ്സിന് ദൈവം പ്രതിഫലം തരട്ടെ എന്നു മാത്രം പ്രാര്‍ത്ഥിക്കുന്നു…
പാഴൂര്‍ മോട്ടോര്‍സിലെ സന്തോഷിനും സഹപ്രവര്‍ത്തകര്‍ക്കും ഞങ്ങളുടെ ബിഗ് സല്യൂട്ട്…
എല്ലാവരും ഇത് ഷെയര്‍ ചെയ്യാന്‍ മറക്കരുത്.. കാരണം കൂടുതല്‍ നന്മകള്‍ ചെയ്യാന്‍ അവര്‍ക്ക് അത് പ്രയോജനമാകട്ടെ,,, നന്ദി…
