സിനിമയുടെ പ്രൊമോഷന്റെ ഭാഗമായി കോഴിക്കോട്ടെത്തിയ യുവനടിമാർ നേരിട്ട ലൈംഗികാതിക്രമണത്തിൽ പ്രതികരണവുമായി നടി ശ്വേത മേനോൻ. ഇതുപോലുള്ള അതിക്രമങ്ങളെ പൊതുസമൂഹത്തിന് മുൻപിൽ തുറന്ന് കാണിക്കണമെന്ന് ശ്വേത പറഞ്ഞു. കൂടാതെ അതിക്രമം നടന്നപ്പോൾ മൗനം പാലിക്കാതെ യുവനടിമാരെ ശ്വേത പ്രത്യേകം അഭിനന്ദിക്കുകയും ചെയ്തു.
ചൊവ്വാഴ്ച വൈകുന്നേരമായിരുന്നു നടിമാർക്ക് കോഴിക്കോട് മാളിൽ ദുരനുഭവം ഉണ്ടായത്. സിനിമാ പ്രമോഷന്റെ ഭാഗമായിട്ട് എത്തിയതായിരുന്നു താരങ്ങൾ. പ്രധാന താരങ്ങളെല്ലാവരും വരുന്നതിനാൽ വൻ തിരക്കാണ് ഷോപ്പിംഗ് മാളിൽ അനുഭവപ്പെട്ടത്. പ്രചാരണപരിപാടി കഴിഞ്ഞ് തിരിച്ചിറങ്ങുന്ന സമയത്താണ് രണ്ട് നടിമാർക്കും നേരെ ആൾക്കൂട്ടത്തിനിടയിൽ നിന്ന് ദുരനുഭവമുണ്ടായത്.
സംഭവത്തിൽ നടിമാരിലൊരാൾ തന്നെ കയറിപ്പിടിക്കാൻ ശ്രമിച്ചയാളുടെ മുഖത്തടിക്കുകയും ചെയ്യുന്നുണ്ട്. മറ്റൊരു നടിയാകട്ടെ സമൂഹമാധ്യമങ്ങളിലൂടെ തനിക്കുണ്ടായ ദുരനുഭവം തുറന്ന് പറയുകയും ചെയ്തു. സംഭവത്തിൽ പന്തീരങ്കാവ് പോലീസ് കേസെടുത്തു. മാളിലെ സിസിടിവി ദൃശ്യങ്ങളും പോലീസ് പരിശോധിക്കും.