ചെന്നൈ: രാഷ്ട്രീയ പാർട്ടി രൂപീകരണത്തെ ചൊല്ലി പിതാവ് എസ്എ ചന്ദ്രശേഖറുമായുള്ള ഭിന്നതയ്ക്കിടെ തമിഴ് സൂപ്പർതാരം വിജയ് ആരാധക സംഘടനയുടെ പ്രവർത്തനം നവമാധ്യമങ്ങളിലൂടെ സജീവമാക്കുന്നു. ആരാധക സംഘടനയായ വിജയ് മക്കൾ ഇയക്കത്തിന്റെ പേരിൽ യുട്യൂബ് ചാനൽ ആരംഭിക്കാനാണ് തീരുമാനം. വിജയ്‌യുടെ പ്രസ്താവനകളും അറിയിപ്പുകളും ആരാധകർക്കുള്ള നിർദേശവുമൊക്കെ ഇനി ഈ ചാനലിലൂടെ അറിയിക്കുമെന്ന് ആരാധകസംഘടനയുടെ ചുമതല വഹിക്കുന്ന എൻ ആനന്ദ് അറിയിച്ചു.
യുട്യൂബ് ചാനൽ ആരംഭിക്കുന്നതിന് മുന്നോടിയായി ഞായറാഴ്ച വിഴുപുരത്ത് എൻ ആനന്ദ് വിജയ് മക്കൾ ഇയക്കത്തിന്റെ ജില്ലാ നേതാക്കളുമായി ചർച്ചനടത്തി. സംഘടന നടത്തുന്ന പ്രവർത്തനങ്ങൾ ചാനലിലൂടെ ജനങ്ങളിൽ എത്തിക്കാനാണ് തീരുമാനം. ചന്ദ്രശേഖറിന് പകരം സംഘടനയുടെ പ്രവർത്തനം പൂർണമായും വിജയ്‌യുടെ നിയന്ത്രണത്തിലാക്കുകയാണ് പുതിയ നീക്കങ്ങൾ ലക്ഷ്യമിടുന്നത്.
മുമ്പ് വിജയ്‌യുടെ ആരാധകസംഘടന രാഷ്ട്രീയപ്പാർട്ടിയാക്കി മാറ്റാൻ ചന്ദ്രശേഖർ ശ്രമിച്ചിരുന്നു. എന്നാൽ വിജയ് ഇതിനെ പരസ്യമായി തള്ളിയതോടെ രാഷ്ട്രീയപ്പാർട്ടി രൂപീകരണം നിർത്തിവെച്ചിരിക്കുകയാണ്. പിതാവുമായുള്ള വിവാദത്തെത്തുടർന്ന് ചന്ദ്രശേഖറുമായി അടുപ്പമുള്ളവരെ ആരാധകസംഘടനയിൽനിന്ന് ഒഴിവാക്കാൻ വിജയ് നടപടിയെടുത്തിരുന്നു.