പത്തനംതിട്ട: ലോക്‌സഭ തിരഞ്ഞെടുപ്പില്‍ ബിജെപി നാന്നൂറിലധികം സീറ്റുകള്‍ നേടുമെന്ന് ആവര്‍ത്തിച്ച് പ്രധാനമന്ത്രി നരേന്ദ്ര മോഡി. കേരളത്തില്‍ രണ്ടക്ക സീറ്റ് ഇത്തവണ നേടുമെന്നും പത്തനംതിട്ടയില്‍ അനില്‍ ആന്റണിയുടെ തിരഞ്ഞെടുപ്പ് പ്രചാരണയോഗത്തില്‍ പങ്കെടുത്ത് അദ്ദേഹം പറഞ്ഞു. പൊതു സമ്മേളനത്തിനെത്തിയവരെ മലയാളത്തിലാണ് പ്രധാനമന്ത്രി അഭിസംബോധന ചെയ്തത്.
ദേശീയതലത്തില്‍ എല്‍ഡിഎഫും യുഡിഎഫും ഒന്നിച്ചാണ്. കേരളത്തില്‍ മാത്രം പോരാടി ജനങ്ങളെ കബളിപ്പിക്കുകയാണ്. ത്രിപുരയിലും തമിഴ്‌നാട്ടിലും ഉള്‍പ്പടെ നാമാവശേഷമായെന്നും അദ്ദേഹം പരിഹസിച്ചു. കോണ്‍ഗ്രസിന്റേത് സോളാര്‍ കൊള്ളയാണെങ്കില്‍ എല്‍ഡിഎഫിന്റേത് സ്വര്‍ണക്കൊള്ളയാണെന്നും അക്രമ രാഷ്ട്രീയവും ഭിന്നിപ്പിക്കുന്ന നയവുമാണ് ഇരുമുന്നണികള്‍ക്കും ഉള്ളതെന്നും മോഡി പറഞ്ഞു. മലയാളികള്‍ പുരോഗമന ചിന്തയുള്ളവരാണെന്നും പക്ഷേ കോണ്‍ഗ്രസും ഇടതുപക്ഷവും പ്രാചീന കാലത്തിലാണെന്നും അദ്ദേഹം കൂട്ടിച്ചേര്‍ത്തു.
