കൊച്ചി: കൊച്ചിയിൽ നടി ആക്രമിക്കപ്പെട്ട സംഭവം നടന്നിട്ട് അഞ്ച് വർഷം പൂർത്തിയാവുകയാണ്. അഞ്ച് വർഷത്തിന് ശേഷവും കേസ് എങ്ങുമെത്താതെ തുടർന്നുകൊണ്ടിരക്കുകയാണ്. നടി ആക്രമിക്കപ്പെട്ടതിന്റെ അഞ്ചാം വർഷത്തിൽ സർക്കാരിനോടും സമൂഹത്തോടും സ്ത്രീസുരക്ഷയെ പറ്റിയുള്ള ചോദ്യമുന്നയിക്കുകയാണ് (ഡബ്ലു.സി.സി)വുമൺ ഇൻ സിനിമ കളക്ടീവ്.
നടി ആക്രമിക്കപ്പെട്ട സംഭവം നടന്നിട്ട് അഞ്ച് വർഷമായെന്നും സർക്കാരും മറ്റ് അധികാരകേന്ദ്രങ്ങളും ഇനി ഇത് ആവർത്തിക്കാതിരിക്കാൻ എന്താണ് ചെയ്തതെന്നും ‘അതിജീവിതയെ പിന്തുണക്കുന്നതിനും അവളുടെ പോരാട്ടത്തിൽ കൂടെ നിൽക്കുന്നതിനും സിനിമാ ഇൻഡസ്ട്രി എന്തുചെയ്തുവെന്നും സമൂഹമാധ്യമത്തിൽ പങ്കുവെച്ച് പോസ്റ്റിൽ ഡബ്ലു.സി.സി ചോദിക്കുന്നു.
2017 ഫെബ്രുവരി 17നാണ് എറണാകുളം അങ്കമാലിക്ക് അടുത്ത് വെച്ച് യുവനടിക്കു നേരെ ആക്രമണം നടന്നത്. തൃശൂരിൽ നിന്ന് എറണാകുളത്തേക്ക് പോവുകയായിരുന്ന നടിയുടെ കാർ തടഞ്ഞു നിർത്തി അക്രമികൾ നടിയെ ഉപദ്രവിക്കുകയായിരുന്നു.