തിരുവനന്തപുരം: കാട്ടാക്കടയിലെ കള്ള് ഷാപ്പില്‍ വന്‍ കവര്‍ച്ച. കള്ളും പണവും ഭക്ഷണസാധനങ്ങളുമാണ് മോഷണം പോയത്. 38 കുപ്പി കള്ള്, 15 പ്ലേറ്റ് ഇറച്ചി, 10 പ്ലേറ്റ് കപ്പ, 2 കുപ്പി അച്ചാര്‍, ഒരു ട്രേ മുട്ട, കറി വിറ്റ വകയില്‍ ഉണ്ടായിരുന്ന 1500 രൂപ എന്നിവയാണ് ഷാപ്പില്‍ നിന്നും മോഷണം പോയത്. ഇതില്‍ 9 കുപ്പി കള്ള് സാമ്പിള്‍ പരിശോധനയ്ക്ക് ശേഷം മാറ്റിവെച്ചിരുന്നതാണ്.
എഐടിയുസി യൂണിയന്‍ തൊഴിലാളികള്‍ നേരിട്ട് നടത്തുന്ന കള്ള് ഷാപ്പിലാണ് മോഷണം നടന്നത്. സതീഷനാണ് ലൈസന്‍സി ഓണര്‍. ഇതില്‍ 9 കുപ്പി കള്ള് കഴിഞ്ഞ വര്‍ഷത്തെ പരിശോധനയ്ക്ക് ശേഷം മാറ്റി വച്ചിരുന്ന സാമ്പിളുകളാണ്. ഇത് വീര്യമേറിയതും അപകടകാരിയുമാണെന്ന് ഷാപ്പ് ഉടമ പറഞ്ഞു.
ഇത് ആരെങ്കിലും കുടിച്ചാല്‍ വലിയ വിപത്തുണ്ടാകുമെന്നും ഷാപ്പ് തൊഴിലാളികള്‍ മുന്നറിയിപ്പ് നല്‍കി. സംഭവത്തില്‍ കാട്ടാക്കട പോലീസ് കേസെടുത്തു.