തിരുവനന്തപുരം: ആരോഗ്യമന്ത്രി കെ കെ ശൈലജയ്‌ക്കെതിരായി കെ പി സി സി പ്രസിഡന്റ് മുല്ലപ്പള്ളി രാമചന്ദ്രന്‍ നടത്തിയ വിവാദ പരാമര്‍ശങ്ങളില്‍ പ്രതിഷേധം ആളിക്കത്തുകയാണ്. പ്രമുഖരടക്കം നിരവധി പേരാണ് മുല്ലപ്പള്ളിയെ രൂക്ഷമായ വമര്‍ശിച്ചുകൊണ്ട് ഇതിനോടകം രംഗത്തെത്തിയത്.
കോണ്‍ഗ്രസ് നേതാക്കള്‍ മുല്ലപ്പള്ളിയെ പിന്തുണയ്ക്കുമ്പോഴും കെപിസിസി പ്രസിഡന്റ് മാപ്പ് പറയണമെന്ന് നാനഭാഗങ്ങളില്‍ നിന്നും ആവശ്യം ഉയര്‍ന്നിട്ടുണ്ട്. എന്നാല്‍ താന്‍ തെറ്റൊന്നും പറഞ്ഞിട്ടില്ലെന്നായിരുന്നു മുല്ലപ്പള്ളിയുടെ വാദം. ഇപ്പോഴിതാ ആരോഗ്യമന്ത്രി കെകെ ശൈലജയ്ക്ക് പിന്തുണയുമായി രംഗത്തെത്തിയിരിക്കുകയാണ് സംവിധായകനായ ഡോ ബിജു.
ഫേസ്ബുക്കിലൂടെയാണ് ആരോഗ്യമന്ത്രിയെ പ്രശംസിച്ച് ഡോ ബിജു രംഗത്തെത്തിയത്. ഞങ്ങളെ സംബന്ധിച്ചിടത്തോളം ടീച്ചര്‍ ഒരു റോക്ക് സ്റ്റാര്‍ തന്നെയാണ്….ആരോഗ്യ , ആയുഷ് വകുപ്പുകളെ ഇത്ര സജീവമായി ,ഊര്‍ജ്ജസ്വലമായി ,ക്രിയാത്മകമായി, പ്രോഗ്രസീവ് ആയി, എഫിഷ്യന്റ് ആയി നയിച്ചിട്ടുള്ള മറ്റൊരു വകുപ്പ് മന്ത്രി ഉണ്ടായിട്ടില്ലെന്ന് ഡോ ബിജു പറയുന്നു.
ശൈലജ ടീച്ചര്‍ മന്ത്രി ആയിരിക്കുന്ന വകുപ്പിലാണ് ജോലി ചെയ്യുന്നത് എന്നതില്‍ ഏറെ അഭിമാനം..ഞങ്ങളെ സംബന്ധിച്ചിടത്തോളം ടീച്ചര്‍ ഒരു റോക്ക് സ്റ്റാര്‍ തന്നെയാണെന്നും ഡോ ബിജു ഫേസ്ബുക്കില്‍ കുറിച്ചു. അതേസമയം, താന്‍ ആരെയും ആക്ഷേപിച്ചിട്ടില്ല. ആരോഗ്യമന്ത്രിയെ കുറിച്ച് തെറ്റായ ഒരു പദപ്രയോഗവും ഞാന്‍ നടത്തിയിട്ടില്ലെന്നും സ്ത്രീ പുരുഷ സമത്വത്തിന് വേണ്ടി നിലകൊണ്ട വ്യക്തിയാണ് താനെന്നും ഫേസ്ബുക്കില്‍ പങ്കുവെച്ച കുറിപ്പില്‍ മുല്ലപ്പള്ളി പറഞ്ഞു.