മുംബൈ: ടിക് ടോക് താരത്തെ കാണാന്‍ പതിനാലുകാരി വീട് വിട്ടിറങ്ങി. നേപ്പാള്‍ സ്വദേശിയായ പതിനാറുകാരനെ കാണാന്‍ വേണ്ടിയാണ് പെണ്‍കുട്ടി കത്ത് എഴുതി വെച്ച് വീട് വിട്ട് പോയത്. ഇനി ഒരു തിരിച്ച് വരവ് ഉണ്ടാവില്ല എന്നും സ്വയം പര്യാപ്തയാവാന്‍ വേണ്ടിയാണ് വീട് വിട്ട് പോവുന്നതെന്നും പെണ്‍കുട്ടി കത്തില്‍ കുറിച്ചു. എന്നാല്‍, പെണ്‍കുട്ടിയെ തെരഞ്ഞുപിടിച്ച് കാരണം തിരക്കിയപ്പോഴാണ് ഒളിച്ചോട്ടത്തിന് പിന്നില്‍ ടിക് ടോക് ആണെന്ന് മനസ്സിലായത്.
‘മമ്മീ, ഞാന്‍ വീട് വിട്ടുപോകുന്നു. ബാബായുടെ (അച്ഛന്റെ) കാര്യത്തില്‍ ഞാന്‍ ദുഖിതയാണ്. എന്നെക്കുറിച്ച് ഒരുപാട് ആലോചിക്കരുത്. ഇതിന്റെ പേരില്‍ ആത്മഹത്യ ചെയ്യരുത്. ഞാനേതെങ്കിലും ആണ്‍കുട്ടിയ്ക്കൊപ്പം ഒളിച്ചോടുകയാണെന്ന് കരുതരുത്. സത്യം അതല്ല. ഞാനാരുടെയും കൂടെ പോകുകയല്ല’- പെണ്‍കുട്ടി കത്തിലെഴുതി. കത്ത് കണ്ട വീട്ടുകാര്‍ പോലീസില്‍ വിവരം അറിയിച്ചു.
നിമിഷങ്ങള്‍ക്കുള്ളില്‍ തന്നെ പോലീസ് പെണ്‍കുട്ടിയെ കണ്ടെത്തി. ടിക് ടോകില്‍ താരമായ നേപ്പാള്‍ സ്വദേശിയായ പതിനാറുകാരനെ നേരില്‍ കാണാനാണ് താന്‍ വീടുവിട്ടിറങ്ങിയതെന്ന് പെണ്‍കുട്ടി പോലീസിനോട് പറഞ്ഞു. വീട്ടില്‍ തനിക്ക് യൊതൊരു സ്വാതന്ത്രവും ഇല്ലെന്നും ആണ്‍കുട്ടികളോട് സംസാരിക്കാന്‍ പോലും പിതാവ് തന്നെ അനുവദിക്കാറില്ലെന്നും നിയന്ത്രണങ്ങളില്‍ നിന്ന് മോചനം നേടിയാണ് താന്‍ വീട് വിട്ടതെന്നും പെണ്‍കുട്ടി പറഞ്ഞു. അതേസമയം ടിക് ടോക് താരമായ റിയാസ് അഫ്രീന്റെ ആരാധികയാണ് പെണ്‍കുട്ടി, റിയാസിനെ കാണാന്‍ വേണ്ടിയാണ് പോയതെന്നും പെണ്‍കുട്ടി പോലീസിനോട് പറഞ്ഞു.