ഹൈദരാബാദ്: വിവാദ ആള്‍ദൈവം ബാല സായി ബാബ അന്തരിച്ചു. അമ്പത്തെട്ട് വയസ്സായിരുന്നു. ഹൈദരാബാദിലെ സ്വകാര്യ ആശുപത്രിയില്‍ ചികില്‍സയിലായിരിക്കെ ഹൃദയസ്തംഭനത്തെ തുടര്‍ന്നായിരുന്നു അന്ത്യം. മാജിക് ബാബയെന്ന പേരില്‍ വിവാദ നായകന്‍ കൂടിയായിരുന്നു അദ്ദേഹം.
എല്ലാ വര്‍ഷവും ശിവരാത്രിയില്‍ ഇദ്ദേഹം വായില്‍ നിന്ന് ശിവലിംഗം തുപ്പുമെന്നാണ് ഭക്തര്‍ അവകാശപ്പെട്ടിരുന്നത്. കൂടാതെ, അന്തരീക്ഷത്തില്‍ നിന്ന് കൈവീശി, ആഭരണങ്ങള്‍ എടുക്കാനും ഇദ്ദേഹത്തിന് കഴിവുണ്ടെന്നാണും പിന്തുടരുന്നവര്‍ വിശ്വസിച്ചിരുന്നു. ഇത്തരത്തിലുള്ള കണ്‍കെട്ട് വിദ്യകളിലൂടെ വലിയ തോതില്‍ സ്വാധീനം ചെലുത്താന്‍ ഇദ്ദേഹത്തിന് കഴിഞ്ഞിരുന്നു
ആന്ധ്രാപ്രദേശിലെ കുര്‍ണൂലില്‍ ആണ് ഈ ആള്‍ദൈവത്തിന്റെ ജനനം. പിന്നീട് തെലങ്കാനയിലും ആന്ധ്രയിലും പ്രശസ്തിയുള്ള ആള്‍ദൈവമായി മാറുകയായിരുന്നു. ഇതിനിടെ ഭൂമി കയ്യേറിയ കേസിലും, ചെക്ക് കേസിലും ഉള്‍പ്പെട്ടതോടെ ബാബ വിവാദങ്ങളിലും നിറഞ്ഞുനിന്നു. കുര്‍ണൂലിന് പുറത്തുള്ള ബാലസായി ഇന്റര്‍നാഷണല്‍ സ്‌കൂളില്‍ വച്ചായിരിക്കും മരണാനന്തര ചടങ്ങുകള്‍ നടക്കുകയെന്നാണ് ആശ്രമവുമായി അടുത്ത വൃത്തങ്ങള്‍ അറിയിക്കുന്നത്. വിദേശത്തും ഇദ്ദേഹത്തിന് ധാരാളം ഭക്തര്‍ ഉണ്ടായിരുന്നു.