ഭക്ഷ്യവസ്തുക്കളും മരുന്നുകളും രാജ്യത്ത് ആവശ്യത്തിനുണ്ട്; ലോക്ക്ഡൗൺ നീട്ടിയതിൽ ആശങ്ക വേണ്ടെന്ന് അമിത് ഷാ

ന്യൂഡൽഹി: രാജ്യത്ത് ലോക്ക് ഡൗൺ 19 ദിവസത്തേക്ക് കൂടി നീട്ടിയതിൽ ആശങ്ക വേണ്ടെന്ന് കേന്ദ്ര ആഭ്യന്തരമന്ത്രി അമിത് ഷാ. ഭക്ഷ്യവസ്തുക്കളും മരുന്നുകളും മറ്റ് അവശ്യവസ്തുക്കളും രാജ്യത്ത് ആവശ്യത്തിനുണ്ടെന്ന് അമിത് ഷാ വ്യക്തമാക്കി. വൈറസ് വ്യാപനം തടയുന്നതിന് എല്ലാ സംസ്ഥാനങ്ങളും കേന്ദ്രസർക്കാരുമായി സഹകരിച്ച് പ്രവർത്തിക്കുന്നുണ്ടെന്നും അമിത് ഷാ ട്വീറ്റ് ചെയ്തു.

ഭക്ഷ്യവസ്തുക്കൾ, മരുന്ന് എന്നിവയടക്കമുള്ള അവശ്യവസ്തുക്കൾ രാജ്യത്ത് ആവശ്യത്തിന് കരുതലുണ്ടെന്ന് ആഭ്യന്തര മന്ത്രി എന്ന നിലയിൽ എല്ലാവർക്കും ഉറപ്പുനൽകുകയാണ്. ഇക്കാര്യത്തിൽ ആരും ആശങ്കപ്പെടേണ്ടതില്ല. സമ്പന്നരായ ജനങ്ങൾ സഹായം ആവശ്യമുള്ള പാവപ്പെട്ടവരെ സഹായിക്കാൻ മുന്നോട്ടുവരണമെന്നും അഭ്യർത്ഥിക്കുകയാണ്- അമിത് ഷാ ട്വീറ്റിൽ പറഞ്ഞു.

എല്ലാ സംസ്ഥാനങ്ങളും അഭിനന്ദനീയമായ വിധത്തിൽ കേന്ദ്രസർക്കാരിനൊപ്പം ചേർന്ന് പ്രവർത്തിക്കുന്നുണ്ട്. ഈ സഹകരണം ഇനിയും വർധിപ്പിക്കേണ്ടതുണ്ട്. എല്ലാ ജനങ്ങളും ലോക്ക്ഡൗൺ ശരിയായ രീതിയിൽ പാലിക്കുന്നുണ്ടെന്നും ഒരാൾക്ക് പോലും അവശ്യവസ്തുക്കൾക്ക് ബുദ്ധിമുട്ട് ഉണ്ടാകുന്നില്ലെന്നും ഉറപ്പുവരുത്തേണ്ടതുണ്ടെന്നും മന്ത്രി പറഞ്ഞു.

കൊവിഡ് 19 വ്യാപിക്കുന്നത് തടയാനും ഇന്ത്യയെയും ഇന്ത്യക്കാരെയും അപകടത്തിൽനിന്ന് രക്ഷിക്കാനുമാണ് പ്രധാനമന്ത്രി ലോക്ക് ഡൗൺ മേയ് മൂന്നു വരെ ദീർഘിപ്പിച്ചത്. അക്കാര്യത്തിൽ അദ്ദേഹത്തോടുള്ള നന്ദി അറിയിക്കുകയാണ്. ലോക്ക്ഡൗൺ കാലത്ത് ബിജെപി പ്രവർത്തകർ പാവങ്ങളെ സഹായിക്കാൻ നടത്തുന്ന പ്രവർത്തനങ്ങൾ അഭിനന്ദനീയമാണെന്നും അമിത് ഷാ പറഞ്ഞു.