വാഷിംഗ്ടണ്: പൗരത്വ നിയമ ഭേദഗതിയും ദേശീയ പൗരത്വ പട്ടികയും ഇന്ത്യയിലെ മതേതരത്വത്തിനും ജനാധിപത്യമൂല്യങ്ങള്ക്കും വിരുദ്ധമാണെന്ന് യുഎസ് സെനറ്റര് ബോബ് മെനന്ഡസ്. പൗരത്വ നിയമ ഭേദഗതിയും ദേശീയ പൗരത്വ പട്ടികയും പിന്വലിക്കാന് ഇന്ത്യന് സര്ക്കാറില് സമ്മര്ദ്ദം ചെലുത്തണമെന്നും യുഎസ് സെനറ്റര് ബോബ് മെനന്ഡസ് ആവശ്യപ്പെട്ടു. യുഎസ് സ്റ്റേറ്റ് സെക്രട്ടറി മൈക് പോംപിയക്ക് എഴുതിയ കത്തിലാണ് ബോബ് മെനന്ഡസ് ഇക്കാര്യം ആവശ്യപ്പെട്ടത്. വിദേശ കാര്യ കമ്മിറ്റിയിലെ അംഗമാണ് ബോബ് മെനന്ഡസ്.
പൗരത്വ നിയമ ഭേദഗതിയനുസരിച്ച് മതാടിസ്ഥാനത്തിലാണ് പൗരത്വം നല്കുന്നത്. ഇത് അന്താരാഷ്ട്ര മാനദണ്ഡങ്ങള്ക്ക് വിരുദ്ധമാണ്. ഇന്ത്യന് ഭരണഘടന നല്കുന്ന തുല്യതക്കും വിവേചന രാഹിത്യത്തിനും വിരുദ്ധമാണ് നിയമം.ഇന്ത്യയിലെ ജനാധിപത്യ മൂല്യങ്ങളും മതസ്വാതന്ത്ര്യവും മനുഷ്യാവകശവും സംരക്ഷിക്കപ്പെടാന് യുഎസ് ഇടപെടണം. ഇതിന് ഇന്ത്യന് സര്ക്കാറിന് മേല് യുഎസ് ശക്തമായ സമ്മര്ദ്ദം ചെലുത്തണമെന്നും അദ്ദേഹം പറഞ്ഞു.
എന്ആര്സി നടപ്പായാല് ഇന്ത്യയിലെ മുസ്ലീങ്ങളെ ബാധിക്കും. റോഹിംഗ്യന് മുസ്ലീങ്ങളെയും പാകിസ്ഥാനിലെ അഹമ്മദീയ വിഭാഗക്കാരെയും ഒഴിവാക്കിയതിലൂടെ ഇത് മതവിവേചനമാണെന്ന് സ്പഷ്ടമാണെന്നും അദ്ദേഹം പറഞ്ഞു.