കൊല്ലം; കൊറോണയ്‌ക്കെതിരെ ഒറ്റക്കെട്ടായി കേരളം പൊരുതുമ്പോള്‍ 6 ദിവസത്തെ ശമ്പളം മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കണമെന്ന ഉത്തരവ് അധ്യാപകര്‍ കത്തിച്ച സംഭവം വലിയ വിവാദമായി മാറിയിരുന്നു. അഞ്ച് മാസമായി ആറ് ദിവസത്തെ സാലറി പിടിക്കാന്‍ തിരുമാനിച്ച സര്‍ക്കാര്‍ നടപടിയ്‌ക്കെതിരെയാണ് ചില അധ്യാപകര്‍ രംഗത്തെത്തിയത്.
അധ്യാപകര്‍ ഉത്തരവ് കത്തിച്ച സംഭവം വിവാദമായി മാറുമ്പോഴും മുഖ്യമന്ത്രിയുടെ ദുരിതാശ്വാസ നിധിയിലേക്ക് സുമനസ്സുകളുടെ സംഭാവന ഒഴുകിയെത്തുകയാണ്. ഈ വിഷയത്തില്‍ പ്രതികരിച്ച് രംഗത്തെത്തിയിരിക്കുകയാണ് നടനും എംഎല്‍എയുമായ മുകേഷ്.
ഉപജീവനമാര്‍ഗമായ തന്റെ ആടിനെ വിറ്റ് സംഭാവന നല്‍കിയ സുബൈദയെന്ന സ്ത്രീയെ കുറിച്ചാണ് മുകേഷ് തന്റെ ഫേസ്ബുക്ക് പേജിലൂടെ പറയുന്നത്. ആ ഉമ്മയുടെ 5510 രൂപയ്ക്ക് അവരുടെ ജീവന്റെ വിലയുണ്ട് കാരണം അവരുടെ ഉപജീവന മാര്‍ഗം കൂടി ആയിരുന്നു അവരുടെ ആടുകള്‍ എന്ന് മുകേഷ് ഫേസ്ബുക്കില്‍ കുറിച്ചു.
ജീവിത പ്രാരാബ്ദങ്ങള്‍ക്ക് ഇടയിലും മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കാന്‍ സുബൈദ ഉമ്മ ആഗ്രഹിച്ചിരുന്നുവെന്നും അതിന് വഴി കണ്ടത് ആടിനെ വില്‍ക്കുക എന്നതുമായിരുന്നെന്നും മുകേഷ് പറയുന്നു. അടിനെ വിറ്റായാലും ഒടുവില്‍ ആഗ്രഹം സഫലമായ ചാരിതാര്‍ത്ഥ്യത്തിലാണ് സുബൈദ ഉമ്മയെന്നും ഉമ്മയെ വീട്ടില്‍ എത്തി അഭിനന്ദിച്ചുവെന്നും എംഎല്‍എ മുകേഷ് ഫേസ്ബുക്കില്‍ കുറിച്ചു.
മുകേഷിന്റെ ഫേസ്ബുക്ക് പോസ്റ്റിന്റെ പൂര്‍ണരൂപം
ഉത്തരവുകള്‍ കത്തിച്ചവര്‍ അറിയുന്നതിന്…
ഇന്നത്തെ എന്റെ ദിവസം ആരംഭിച്ചത് എന്റെ മണ്ഡലത്തിലെ ഇന്നത്തെ നായിക സുബൈദാ ഉമ്മയുടെ വീട്ടില്‍ നിന്നുമാണ്…
ആ ഉമ്മയുടെ 5510 രൂപയ്ക്ക് അവരുടെ ജീവന്റെ വിലയുണ്ട് കാരണം അവരുടെ ഉപജീവന മാര്‍ഗം കൂടി ആയിരുന്നു അവരുടെ ആടുകള്‍…
ജീവിത പ്രാരാബ്ദങ്ങള്‍ക്ക് ഇടയിലും മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കാന്‍ ആഗ്രഹിച്ചിരുന്ന സുബൈദ ഉമ്മ അതിന് വഴി കണ്ടത് ആടിനെ വിറ്റ്. കൊല്ലം പോര്‍ട്ട് ഓഫീസിനു സമീപം ചായക്കട നടത്തുന്ന പോര്‍ട്ട് കൊല്ലം സംഗമം നഗര്‍-77 ലെ സുബൈദ ഉമ്മയാണ് ആടിനെ വിറ്റ് കിട്ടിയ തുകയില്‍ നിന്ന് 5510 രൂപ കൈമാറിയത്. ഹൃദ്രോഗ ബാധിതനായി ഓപ്പറേഷന് വിധേയനായ ഭര്‍ത്താവ് അബ്ദുള്‍ സലാമിനും ഹൃദ്രോഗിയായ സഹോദരനുമൊപ്പമാണ് താമസം.
ആടിനെ വിറ്റപ്പോള്‍ കിട്ടിയ പന്ത്രണ്ടായിരം രൂപയില്‍ അയ്യായിരം വാടക കുടിശ്ശിക നല്‍കി രണ്ടായിരം കറണ്ട് ചാര്‍ജ്ജ് കുടിശ്ശികയും നല്‍കി. ദിവസവും മുടങ്ങാതെ മുഖ്യമന്ത്രിയുടെ വാര്‍ത്താ സമ്മേളനം ചാനലില്‍ കാണുന്ന സുബൈദ ഉമ്മ കുട്ടികള്‍ വിഷുകൈനീട്ടം ദുരിതാശ്വാസ നിധിയിലേക്ക് നല്‍കുന്നത് അറിഞ്ഞതു മുതല്‍ ആലോച്ചിതാണ് സംഭാവന നല്‍കണമെന്നത്. ലോക്ക് ഡൗണ്‍ തുടങ്ങിയ ശേഷം ചായക്കടയില്‍ കച്ചവടവും വരവും കുറവാണ്. ഭാര്‍ത്താവിനും അനുജനും മുഴുവന്‍ സമയം കടയില്‍ ജോലി ചെയ്യാനും ആവതില്ല. എന്നിരുന്നാലും മുഖ്യമന്ത്രിയുടെ ദുരിതാശ്വാസ നിധിയിലേക്ക് തുക നല്‍കണമെന്നത് സുബൈദഉമ്മയുടെ അടങ്ങാത്ത ആഗ്രഹമായിരുന്നു. . അടിനെ വിറ്റായാലും ഒടുവില്‍ ആഗ്രഹം സഫലമായ ചാരിതാര്‍ത്ഥ്യത്തിലാണ് സുബൈദ ഉമ്മ… ഉമ്മയെ വീട്ടില്‍ എത്തി അഭിനന്ദിച്ചു…..
