പാറ്റയെന്ന് കേള്‍ക്കുമ്പോഴേ ഒട്ടുമിക്കവര്‍ക്കും ഭയവും അറപ്പുമാണ്. അക്കാര്യത്തില്‍ മുന്‍പന്തിയില്‍ നില്‍ക്കും സ്ത്രീജനങ്ങള്‍. ഇപ്പോഴിതാ പെണ്‍കുട്ടികളും ആണ്‍കുട്ടികളും പാറ്റയുടെ പിന്നാലെയാണ്. മറ്റൊന്നിനുമല്ല ഓണ്‍ലൈന്‍ ചാലഞ്ചില്‍ നിറയുവാന്‍. ഒന്നും രണ്ടും പാറ്റകളല്ല, നിരവധി പാറ്റകളെ മുഖത്തിട്ടുകൊണ്ടുള്ള സെല്‍ഫിയാണ് ഇപ്പോള്‍ ട്രെന്‍ഡിങില്‍ നില്‍ക്കുന്നത്.
വിചിത്രവും ഭ്രാന്തവുമായ ഈ ചാലഞ്ചിനെതിരെ ഒരു ഭാഗത്ത് നിന്ന് പ്രതിഷേധവും ഉയരുന്നുണ്ട്‌. ഫേസ്ബുക്ക് ഉപയോക്താവായ മ്യാന്‍മാര്‍ സ്വദേശി അലക്സ് ഓങ് എന്ന കൗമാരക്കാരനാണ് ഈ ചാലഞ്ചിന് തുടക്കമിട്ടത്. ഏപ്രില്‍ 20 നാണ് അലക്സ് ഒരു പാറ്റയെ തന്റെ മുഖത്തുവെച്ചുള്ള ചിത്രം പങ്കുവെച്ചത്. ഇതുപോലെ ചെയ്യാനാകുമോ എന്ന് മറ്റുള്ളവരെ വെല്ലുവിളിക്കുകയും ചെയ്തിരുന്നു.
നിരവധി കൗമാരക്കാര്‍ ഈ വെല്ലുവിളി ഏറ്റെടുത്തു. ഒന്നല്ല രണ്ടില്‍ കൂടുതല്‍ പാറ്റകളെ മുഖത്ത് നിരത്തിവെച്ചുള്ള ചിത്രങ്ങള്‍ വരെ എത്തി. പാറ്റയെ വായില്‍ വെച്ചുവരെയുള്ള ചിത്രങ്ങളും പ്രത്യക്ഷപ്പെട്ടു എന്നതാണ് ഏറെ അമ്പരപ്പിക്കുന്നത്. ഫേസ്ബുക്കില്‍ ആരംഭിച്ച ഈ ചാലഞ്ച് ട്വിറ്ററിലും നിറയുന്നുണ്ട്. മ്യാന്‍മര്‍, ഫിലിപ്പീന്‍സ്, ഇന്തോനേഷ്യ തുടങ്ങിയ രാജ്യങ്ങളില്‍ നിന്നുള്ളവര്‍ക്കാണ് ഈ ചലഞ്ചില്‍ താല്‍പര്യം കൂടുതല്‍.