നാസിക്: ഭര്‍ത്താവിന് നല്‍കിയ വൃക്ക തിരിച്ചു നല്‍കണമെന്ന ആവശ്യവുമായി യുവതിയുടെ വിചിത്ര പരാതി. വൈശാലി(28) എന്ന യുവതിയാണ് പരാതിയുമായി സ്റ്റേഷനില്‍ എത്തിയത്. ഇതോടെ കുഴങ്ങിയത് സാത്പൂര്‍ പോലീസ് സ്‌റ്റേഷനിലെ ഉദ്യോഗസ്ഥരാണ്.
വിവാഹം കഴിഞ്ഞ് ഒരു വര്‍ഷമായപ്പോള്‍ മദ്യപാനിയായ ഭര്‍ത്താവിന്റെ ഇരുവൃക്കകളും തകരാറിലായി. മദ്യപാനം ഉപേക്ഷിക്കുമെന്ന ഉറപ്പില്‍ ഭര്‍ത്താവിനു വൈശാലി വൃക്ക നല്‍കി. കുടുംബാംഗങ്ങളുടെ എതിര്‍പ്പിനെ മറികടന്നായിരുന്നു യുവതി ഭര്‍ത്താവിന് വേണ്ടി ത്യാഗം സഹിച്ചത്. എന്നാല്‍ അവിടെ നിന്നും മാറുവാന്‍ ഭര്‍ത്താവ് തയ്യാറായില്ല.
വൃക്ക മാറ്റിവച്ചതിനെത്തുടര്‍ന്ന് ആരോഗ്യം വീണ്ടെടുത്ത ഭര്‍ത്താവ് കുറച്ചു മാസങ്ങള്‍ക്കുശേഷം വീണ്ടും മദ്യപാനത്തിലേയ്ക്കു തിരിഞ്ഞു. ഇത് വൈശാലി ചോദ്യം ചെയ്യുകയും ചെയ്തു. അതോടെ ഭര്‍ത്താവ് മര്‍ദ്ദനവും തുടങ്ങി. മദ്യപാനത്തിലും തുടരെയുള്ള മര്‍ദ്ദനത്തിലും സഹികെട്ടാണ് വൃക്ക തിരികെ വേണമെന്ന പരാതിയുമായി യുവതി ഒടുവില്‍ പോലീസ് സ്റ്റേഷനില്‍ എത്തിയത്.