കോട്ടയം: പാലാ പൂവരണയില് ഒരു കുടുംബത്തിലെ അഞ്ച് പേര് മരിച്ച നിലയില്. അച്ഛനേയും അമ്മയേയും മൂന്ന് കുട്ടികളെയുമാണ് മരിച്ച നിലയില് കണ്ടെത്തിയത്. ഭാര്യയെയും മക്കളെയും കൊലപ്പെടുത്തി ഭര്ത്താവ് ആത്മഹത്യ ചെയ്തത് ആകാമെന്നാണ് പ്രാഥമിക നിഗമനം.
ജെയ്സണ് (44), ഭാര്യ മെറീന (28) മക്കളായ ജെറാള്ഡ് (4) ജെറീന (2) ജെറിന് (7 മാസം ) എന്നിവരാണ് മരിച്ചത്. പൂവരണി കൊച്ചുകൊട്ടാരം ഭാഗത്ത് വാടകയ്ക്ക് താമസിക്കുകയായിരുന്നു ഇവര്. അകലകുന്നം ഞണ്ടുപാറ സ്വദേശി ആണ് മരിച്ച ജയ്സണ് തോമസ്.
പൂവരണിയില് ഇവര് വാടകയ്ക്ക് താമസിക്കുന്ന വീടിനുള്ളില് കട്ടിലില് മുറിവുകളോടെ രക്തം വാര്ന്ന നിലയിലായിരുന്നു ഭാര്യയുടെയും കുഞ്ഞുങ്ങളുടെയും മൃതദേഹം കണ്ടെത്തിയത്.
ഭാര്യയെയും ചെറിയ കുട്ടിയടക്കം മൂന്ന് കുട്ടികളെയും വെട്ടിയോ കുത്തിയോ കൊന്ന ശേഷം ജയ്സണ് തൂങ്ങിമരിച്ചത് ആണെന്നാണ് പോലീസ് പറയുന്നത്. എന്നാല് എന്താണ് ഇത്രയും ദാരുണമായ നിലയിലേക്ക് ഇവരെ എത്തിച്ചത് എന്നത് വ്യക്തമല്ല.
ഒരു റബര് ഫാക്ടറിയില് ഡ്രൈവറാണ് ജയ്സണ് തോമസ് എന്നാണ് സൂചന. ഇവര് പൂവരണിയില് താമസമാക്കിയിട്ട് ഒരു വര്ഷമായിട്ടേയുള്ളൂ. അതുകൊണ്ട് തന്നെ അയല്ക്കാര്ക്കും പരിമിതമായ വിവരങ്ങളേ ഇവരെ കുറിച്ചുള്ളൂ. പോലീസ് സംഭവത്തെ കുറിച്ച് അന്വേഷണം ആരംഭിച്ചു.