പത്തനംതിട്ട: ശബരിമലയില് നിലനില്ക്കുന്ന നിരോധനാജ്ഞ രണ്ട് ദിവസം കൂടി നീട്ടി. സുരക്ഷയുടെ ഭാഗമായി ഏര്പ്പെടുത്തിയ നിരോധനാജ്ഞ ഇന്ന് തീരുന്ന സാഹചര്യത്തിലാണ് നീട്ടിയത്. ജില്ലാ പോലീസ് സൂപ്രണ്ടിന്റെയും എക്സിക്യുട്ടീവ് മജിസ്ട്രേറ്റുമാരുടെയും റിപ്പോര്ട്ടിന്റെ അടിസ്ഥാനത്തിലാണ് നിരോധനാജ്ഞ നീട്ടി കലക്ടര് ഉത്തരവിറക്കിയത്.
ഇലവുങ്കല് മുതല് സന്നിധാനം വരെയാണ് നിരോധനാജ്ഞ പ്രഖ്യാപിച്ചിരുന്നത്. ഇലവുങ്കല് മുതല് സന്നിധാനം വരെയുള്ള എല്ലാ പ്രദേശങ്ങളിലും റോഡുകളിലും ഉപറോഡുകളിലും നിരോധനാജ്ഞ ബാധകമായിരിക്കും. ശബരിമല ദര്ശനത്തിനെത്തുന്ന തീര്ഥാടകര്ക്ക് ദര്ശനം നടത്തുന്നതിനോ ശരണംവിളിക്കുന്നതിനോ യാതൊരു തടസ്സവും ഉണ്ടായിരിക്കില്ലെന്ന് ഉത്തരവില് പറയുന്നു.