തിരുവനന്തപുരം: ശബരിമല വിഷത്തില്‍ കോണ്‍ഗ്രസ് എന്നും ഭക്തര്‍ക്കൊപ്പമാണെന്നും ആര്‍എസ്എസും ബിജെപിയും ശബരിമലയെ സംഘര്‍ഷ ഭൂമിയാക്കാന്‍ ശ്രമിക്കുകയാണെന്നും പ്രതിപക്ഷ നേതാവ് രമേശ് ചെന്നിത്തല ആരോപിച്ചു.
ശബരിമലയില്‍ വിശ്വാസം സംരക്ഷിക്കാന്‍ യുഡിഎഫ് ഏതറ്റം വരെയും പോകും. വിശ്വാസികളുടെ വികാരം വ്രണപ്പെടുത്തുന്ന നടപടിയോട് കോണ്‍ഗ്രസിന് യോജിക്കാനാകില്ല. വിഷയത്തില്‍ കേന്ദ്രം ഓര്‍ഡിനന്‍സ് ഇറക്കാതെ കള്ളകളി നടത്തുകയാണ്. ഇതിനെ അംഗീകരിക്കാനാകില്ല.അവരുടെ അജണ്ട കേരളത്തില്‍ നടപ്പാവില്ലെന്നും രമേശ് ചെന്നിത്തല പറഞ്ഞു.വിഷയം സമചിത്തതയോടെ തീര്‍പ്പാക്കാനുള്ള ശ്രമങ്ങള്‍ സര്‍ക്കാര്‍ നടത്തുന്നില്ലെന്നും ചെന്നിത്തല ആരോപിച്ചു.
കൊടി പിടിച്ചു കൊണ്ടുള്ള പരിപാടിയില്‍ കോണ്‍ഗ്രസ് പ്രവര്‍ത്തകര്‍ പങ്കെടുക്കുന്നില്ല. വിശ്വാസികള്‍ നടത്തുന്ന പ്രാര്‍ത്ഥനാ യജ്ഞത്തില്‍ ഞങ്ങളുണ്ട്. ഭക്തര്‍ക്കൊപ്പം പ്രവര്‍ത്തകര്‍ പോകുന്നത് തെറ്റല്ലെന്നും രമേശ് ചെന്നിത്തല പറഞ്ഞു. കൂടാതെ സുന്നികളുടെ പള്ളിയിലെ സ്ത്രീ പ്രവേശനത്തെക്കുറിച്ച് കോടിയേരിയും ജലീലുമല്ല തീരുമാനിക്കേണ്ടതെന്ന് രമേശ് ചെന്നിത്തല കൂട്ടിച്ചേര്‍ത്തു.