കോഴിക്കോട്: കൊവിഡ് രോഗവ്യാപനത്തിന്റെ പശ്ചാത്തലത്തില്‍ കോഴിക്കോട് ജില്ലയില്‍ കണ്ടെയ്‌ന്മെന്റ് സോണ്‍ ആയി പ്രഖ്യാപിച്ചിരുന്ന പഞ്ചായത്തുകളെ പട്ടികയില്‍ നിന്നും ഒഴിവാക്കിയതായി. കണ്ടെയ്‌ന്മെന്റ് സോണ്‍ ആയി പ്രഖ്യാപിച്ചിരുന്ന തൂണേരി, പുറമേരി, മാവൂര്‍, ഒളവണ്ണ പഞ്ചായത്തുകളെയാണ് പട്ടികയില്‍ നിന്നും ഒഴിവാക്കിയത്.
കോഴിക്കോട് കളക്ടര്‍ സാംബശിവ റാവുവാണ് ഇക്കാര്യം അറിയിച്ചത്. രോഗികളുടെ പരിശോധന ഫലം നെഗറ്റീവ് ആവുകയും രോഗികളുമായി നേരിട്ട് സമ്പര്‍ക്കം ഉള്ളവരുടെ കൊവിഡ് പരിശോധനാ ഫലം നെഗറ്റീവ് ആവുകയും ചെയ്തിരുന്നു. ഈ സാഹചര്യത്തില്‍ ഈ പഞ്ചായത്തുകളില്‍ രോഗപ്പകര്‍ച്ചയില്ലെന്ന് കണ്ടെത്തിയതിനാലാണ് ഈ നാല് ഗ്രാമപഞ്ചായത്തുകളേയും കണ്ടെയ്‌ന്മെന്റ് സോണില്‍ നിന്നും ഒഴിവാക്കിയത്. ഇതോടെ ജില്ലയില്‍ കണ്ടെയിന്മെന്റ് സോണുകള്‍ ഇല്ല.