തിരുവനന്തപുരം: കേന്ദ്രസര്ക്കാരിന്റെ പൗരത്വ നിയമ ഭേദഗതിക്കെതിരെ യുഡിഎഫ് മനുഷ്യഭൂപടം ഇന്ന്. 13 ജില്ലകളിലാണ് യുഡിഎഫ് ഇന്ന് മനുഷ്യഭൂപടം തീര്ക്കുക. എല്ഡിഎഫിന്റെ മനുഷ്യ മഹാശൃംഖലയ്ക്ക് പിന്നാലെയാണ് യുഡിഎഫിന്റെ മനുഷ്യഭൂപടം ഒരുങ്ങുന്നത്.
ശൃംഖലയിലെ ന്യൂനപക്ഷ സമുദായ പ്രാതിനിധ്യം കണക്കിലെടുത്ത് പരമാവധി മത-സാമൂഹ്യ-സാംസ്ക്കാരിക നേതാക്കളെ അണിനിരത്താനാണ് യുഡിഎഫിന്റെ നീക്കം. ജില്ലയിലെ തെരഞ്ഞെടുത്ത സ്ഥലങ്ങളിലാണ് ഭൂപടം തീര്ക്കുന്നത്. ഇന്ത്യയുടെ ഭൂപടത്തിന്റെ മാതൃകയില് നേതാക്കളും അണികളും മൂവര്ണ്ണ നിറത്തിലെ തൊപ്പികള് ധരിച്ച് അണിചേരും.
നാലുമണിക്കാണ് റിഹേഴ്സല്. നാലരക്കാണ് പൊതുയോഗം. 5.05 ന് ഭൂപടം തീര്ക്കും. ഗാന്ധിജി വെടിയേറ്റ് വീണ 5.17 ന് ഭരണഘടനാ സംരക്ഷണ പ്രതിജ്ഞ ചൊല്ലും. തിരുവനന്തപുരത്ത് എ കെ ആന്റണിയും മറ്റിടങ്ങളില് പ്രമുഖ നേതാക്കലും നേതൃത്വം നല്കും.
അതേസമയം, വയനാട്ടില് രാഹുല് ഗാന്ധിയുടെ നേതൃത്വത്തില് ലോംഗ് മാര്ച്ചും നടത്തും. കേന്ദ്രത്തിനും ഗവര്ണ്ണര്ക്കും ഒപ്പം സംസ്ഥാന സര്ക്കാറിനുമെതിരെ പ്രതിഷേധം കടുപ്പിക്കാനാണ് യുഡിഎഫിന്റെ തീരുമാനം. തുടര്ന്ന്, രാഹുല്ഗാന്ധി പൊതുസമ്മേളനത്തില് സംസാരിക്കും.