പ്രശസ്ത മലയാള സിനിമാ നിർമാതാവ് പികെആർ പിള്ള അന്തരിച്ചു. വാർദ്ധക്യ സഹജമായ അസുഖങ്ങളെ തുടർന്ന് ചികിത്സയിവിരിക്കെയായിരുന്നു മരണം. തൃശ്ശൂർ പട്ടിക്കാട്ടെ വീട്ടിലായിരുന്നു അന്ത്യം.
നിർമ്മിച്ച ചിത്രങ്ങളെല്ലാം കലാമേന്മ കൊണ്ടും തീയേറ്റർ വിജയം കൊണ്ടും പേരുകേട്ടവയായിരുന്നു. എങ്കിലും ഈ മുൻ നിർമാതാവിന്റെ അവസാന നാളുകളിൽ മരുന്നിനും ഭക്ഷണത്തിനും പോലും പണമില്ലാതെ ദുരിതത്തിലായിരുന്നു എന്നാണ് പുറത്തുവന്ന വാർത്തകൾ.
പ്രിയദർശൻ-മോഹൻലാൽ കൂട്ടുകെട്ടിൽ പിറന്ന സൂപ്പർഹിറ്റ് സിനിമയായ ചിത്രം ഉൾപ്പടെ 22 സിനിമകൾ നിർമിച്ചിട്ടുണ്ട്. നിരവധി സിനിമകൾ വിതരണം ചെയ്തിട്ടുണ്ട്. ചിത്രം, വന്ദനം, കിഴക്കുണരും പക്ഷി തുടങ്ങി നിരവധി സിനിമകൾ ഷിർദ്ദിസായി ക്രിയേഷൻസ് എന്ന ബാനറിൽ പികെആർ പിള്ളയാണ് ഒരുക്കിയത്.
എറണാകുളം കൂത്താട്ടുകുളം സ്വദേശിയായ പികെആർ പിള്ള മുംബൈയിൽ ബിസിനസ് നടത്തിയിരുന്നു. പിന്നീട് പിള്ള മുംബൈ മുനിസിപ്പാലിറ്റിയിലേക്ക് കോൺഗ്രസ് സ്ഥാനാർത്ഥിയായി മത്സരിച്ചിട്ടുമുണ്ട്. പികെആര് പിള്ളയുടെ സംസ്‌കാരം നാളെ വൈകിട്ട് തൃശ്ശൂരിലെ വീട്ടിൽ.
Discussion about this post