കെജരിവാളിനെ പ്രശംസിച്ച് മിലിന്ദ് ദേവ്‌റ; സഹോദരാ, വേണമെങ്കില്‍ കോണ്‍ഗ്രസ് വിട്ടോളൂ എന്ന് അജയ് മാക്കന്‍, രൂക്ഷവിമര്‍ശനം

ന്യൂഡല്‍ഹി: മൂന്നാംവട്ടവും ഡല്‍ഹി മുഖ്യമന്ത്രി പദത്തിലെത്തിയ അരവിന്ദ് കെജരിവാളിനെ അഭിനന്ദിച്ച് കോണ്‍ഗ്രസ് നേതാവ് മിലിന്ദ് ദേവ്‌റ. ട്വിറ്ററിലൂടെയാണ് അദ്ദേഹം കെജരിവാളിന് അഭിനന്ദനം അറിയിച്ചത്. കെജരിവാള്‍ സര്‍ക്കാരിന്റെ നേട്ടങ്ങളെ കുറിച്ച് പറയുന്ന വീഡിയോ പങ്കുവെച്ചുകൊണ്ടാണ് മിലിന്ദ് ദേവ്‌റയുടെ കുറിപ്പ്.

‘അധികം ആര്‍ക്കും അറിയാത്തതും അഭിനന്ദനീയവുമായ വസ്തുതയാണ് അരവന്ദ് കെജ്രിവാള്‍ നേതൃത്വം നല്‍കിയ ഡല്‍ഹി സര്‍ക്കാര്‍ തങ്ങളുടെ വരുമാനം ഇരട്ടിയാക്കി അറുപതിനായിരം കോടിയിലെത്തിച്ചുവെന്നത്. കൂടാതെ അഞ്ചുവര്‍ഷമായി റവന്യൂ സര്‍പ്ലസ് നിലനിര്‍ത്താനും സാധിച്ചു. ഇന്ത്യയിലെ ഏറ്റവും സാമ്പത്തികജാഗ്രതയുള്ള സംസ്ഥാനങ്ങളിലൊന്നാണ് ഡല്‍ഹി’- മിലിന്ദ് കുറിച്ചു.

എന്നാല്‍ മിലിന്ദിനെതിരെ അതിരൂക്ഷ വിമര്‍ശനവുമായി കോണ്‍ഗ്രസ് നേതാവ് അജയ് മാക്കന്‍ രംഗത്തെത്തി. ട്വിറ്ററിലൂടെയാണ് അദ്ദേഹം മിലിന്ദിനെ വിമര്‍ശിച്ചത്. സഹോദരാ, വേണമെങ്കില്‍ കോണ്‍ഗ്രസ് വിട്ടോളൂ. ശേഷം അര്‍ധസത്യങ്ങള്‍ പ്രചരിപ്പിച്ചു കൊള്ളൂ- അജയ് മാക്കന്‍ കുറിച്ചു. കൂടാതെ കോണ്‍ഗ്രസും ആം ആദ്മി പാര്‍ട്ടിയും ഭരിച്ച സമയത്തെ സിഎജിആര്‍ ശതമാന കണക്കുകളും അജയ് മാക്കന്‍ പങ്കുവെച്ചു.