കണ്ണന്‍ താമരക്കുളം സംവിധാനം നിര്‍വഹിക്കുന്ന പുതു ചിത്രമാണ് പട്ടാഭിരാമന്‍. ജയറാം നായകനായെത്തുന്ന ചിത്രത്തിന്റെ മോഷന്‍ പോസ്റ്റര്‍ പുറത്തിറക്കി. സിനിമയുടെ അനൗണ്‍സ്‌മെന്റ് പോസ്റ്റര്‍ പുറത്തുവിട്ടത് അയ്യര്‍ ദി ഗ്രേറ്റ് എന്ന സബ് ഹെഡിങ്ങോട് കൂടിയാണ്. ബൈജു സന്തോഷും ചിത്രത്തില്‍ ഒരു കേന്ദ്ര കഥാപാത്രത്തെ അവതരിപ്പിക്കുന്നു.
കഴിഞ്ഞ ദിവസം പുറത്തിറക്കിയ മോഷന്‍ പോസ്റ്റര്‍ ഇതിനോടകം തന്നെ സമൂഹമാധ്യമങ്ങളില്‍ വൈറലായിക്കഴിഞ്ഞു. തിരുവനന്തപുരത്തിന്റെ മനോഹാരിത വിളിച്ചോതുന്നതാണ് മോഷന്‍ പോസ്റ്റര്‍. പത്മനാഭസ്വാമി ക്ഷേത്രവും, സെക്രട്ടേറിയറ്റും, വെട്ടിമുറിച്ച കോട്ടയുമെല്ലാം മോഷന്‍ പോസ്റ്ററില്‍ ഉള്‍ക്കൊള്ളിച്ചിട്ടുണ്ട്.
തിരുവനന്തപുരത്ത് വെച്ചുതന്നെയായിരുന്നു സിനിമയുടെ ചിത്രീകരണം. പുതിയ നിയമം, സോളോ എന്നിങ്ങനെയുള്ള നിരവധി ചിത്രങ്ങള്‍ നിര്‍മ്മിച്ച അബാം മൂവിസിന്റെ ബാനറില്‍ എബ്രഹാം മാത്യു ആണ് ഈ ചിത്രം നിര്‍മ്മിച്ചിരിക്കുന്നത്. പാര്‍വതി നമ്പ്യാര്‍, ലെന, മാധുരി ബ്രഗാന്‍സ, ഹരീഷ് കണാരന്‍, ധര്‍മജന്‍, രമേശ് പിഷാരടി, സായികുമാര്‍, നന്ദു, ജയന്‍ ചേര്‍ത്തല, കലാഭവന്‍ പ്രജോദ്, ഇടവേള ബാബു എന്നിങ്ങനെ നിരവധി താരങ്ങള്‍ ചിത്രത്തില്‍ അണിനിരക്കുന്നു.
