നീണ്ട ഇടവേളയ്ക്ക് ശേഷം സംവിധായകന്‍ ഫാസില്‍ സിനിമയിലേക്ക് തിരിച്ചെത്തുന്നു. പക്ഷേ ഇത്തവണ സംവിധായക തൊപ്പി അണിഞ്ഞിട്ടല്ല മറിച്ച് അഭിനേതാവായിട്ടാണ് മലയാളത്തിന്റെ സൂപ്പര്‍ ഹിറ്റ് സംവിധായകന്റെ തിരിച്ചു വരവ്.
പ്രിയദര്‍ശന്‍- മോഹന്‍ലാല്‍ കൂട്ടിക്കെട്ടിലൊരുങ്ങുന്ന മരയ്ക്കാര്‍ അറബിക്കടലിന്റെ സിംഹം എന്ന ചിത്രത്തില്‍ കുട്ട്യാലി മരയ്ക്കാരുടെ വേഷത്തിലാണ് ഫാസില്‍ എത്തുന്നത്. നടന്‍ മധു ചെയ്യുമെന്ന് പറഞ്ഞ വേഷമായിരുന്നു ഇത്. എന്നാല്‍ ചില കാരണങ്ങളാല്‍ മധു പിന്മാറിയതിനെ തുടര്‍ന്നാണ് ഫാസില്‍ ഈ വേഷത്തിലെത്തിയത്. സംവിധായകന്‍ പ്രിയദര്‍ശന്‍ തന്നെയാണ് ഫാസിലിന്റെ പുത്തന്‍ ലുക്കും ഒപ്പമൊരു നന്ദി വാചകവും കൂടെച്ചേര്‍ത്ത് ഫേസ്ബുക് പോസ്റ്റ് ഇട്ടത്.
ഹൈദരാബാദിലെ റാമോജി ഫിലിം സിറ്റിയില്‍ സാബു സിറിളിന്റെ നേതൃത്വത്തില്‍ വന്‍ സെറ്റിട്ടാണ് ചിത്രത്തിന്റെ ചിത്രീകരണം നടക്കുന്നത്. മഞ്ജു വാര്യര്‍, കീര്‍ത്തി സുരേഷ്, കല്യാണി പ്രിയദര്‍ശന്‍, പ്രണവ് മോഹന്‍ലാല്‍, സുനില്‍ ഷെട്ടി, മുകേഷ്, സിദ്ദിഖ്, നെടുമുടി വേണു തുടങ്ങിയ വന്‍ താര നിര തന്നെയുണ്ട് ചിത്രത്തില്‍. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് നിര്‍മ്മാണം.