‘നിങ്ങള്‍ക്ക് നിങ്ങളെമാത്രമാണ് വിശ്വസിപ്പിക്കേണ്ടത്, മറ്റാരെയുമല്ല’ പുതിയ ചിത്രങ്ങള്‍ പങ്കുവെച്ച് മറുപടിയുമായി രംഗത്തെത്തിയിരിക്കുകയാണ് സണ്ണി ലിയോണ്‍. ഇന്‍സ്റ്റഗ്രാമിലൂടെയാണ് താരം നിലപാടും ചിത്രവും പങ്കുവെച്ചിരിക്കുന്നത്. വഞ്ചന കേസില്‍ താരത്തെ ക്രൈംബ്രാഞ്ച് ചോദ്യം ചെയ്തതിന് പിന്നാലെയാണ് താരം ഇന്‍സ്റ്റഗ്രാമിലൂടെ നിലപാട് വ്യക്തമാക്കിയത്.
കഴിഞ്ഞ കുറച്ചുനാളുകളായി കേരളത്തില്‍ അവധിക്കാലം ആഘോഷിക്കുകയാണ് താരം. ‘വസ്തുതകളെ നിങ്ങള്‍ വളച്ചൊടിക്കാന്‍ ശ്രമിച്ചാലും സത്യം സത്യമായി തന്നെ തുടരും. നിങ്ങള്‍ക്ക് നിങ്ങളെമാത്രമാണ് വിശ്വസിപ്പിക്കേണ്ടത്, മറ്റാരെയുമല്ല’, സണ്ണി ലിയോണ്‍ കുറിക്കുന്നു. തിരുവനന്തപുരത്തെ പൂവാര്‍ ദ്വീപില്‍ നിന്നുള്ള ചിത്രങ്ങളാണ് താരം പങ്കുവെച്ചിരിക്കുന്നത്.
തിരുവനന്തപുരം പൂവാറിലെ റിസോര്‍ട്ടില്‍ വെച്ച് ഇക്കഴിഞ്ഞ വ്യാഴാഴ്ചയാണ് ക്രൈം ബ്രാഞ്ച് ഡിവൈഎസ്പി ഇമ്മാനുവല്‍ പോളിന്റെ നേതൃത്വത്തില്‍ സണ്ണി ലിയോണിന്റെ മൊഴി എടുത്തത്. കൊച്ചിയിലെ വിവിധ ഉദ്ഘാടന ചടങ്ങില്‍ പങ്കെടുക്കാന്‍ 29 ലക്ഷം രൂപ അഡ്വാന്‍സ് വാങ്ങിയ ശേഷം നടി വഞ്ചിച്ചെന്ന പരിപാടിയിലായിരുന്നു നടപടി.
2016 മുതല്‍ വിവിധ ഘട്ടങ്ങളിലായി പണം സണ്ണി ലിയോണിന്റെ മാനേജര്‍ ആണ് കൈപ്പറ്റിയതെന്ന് പരാതിക്കാരനായ പെരുമ്പാവൂര്‍ സ്വദേശി ഷിയാസ് ഡിജിപിയ്ക്ക് നല്‍കിയ പരാതിയില്‍ വ്യക്തമാക്കുന്നത്. ഡിജിപിയുടെ നിര്‍ദ്ദേശ പ്രകാരണമാണ് കൊച്ചി ക്രൈം ബ്രാഞ്ച് കേസ് ഏറ്റെടുത്ത് അന്വേഷണം തുടങ്ങിയത്. സംഭവത്തില്‍ താരവും പ്രതികരണം അറിയിച്ച് രംഗത്തെത്തിയിരുന്നു.