വ്യത്യസ്തവും ശക്തമായ കഥാപാത്രങ്ങളിലൂടെ വന്ന് മലയാളി മനസ് കീഴടക്കിയ നടിമാരില് ഒരാളാണ് ലെന. അമ്മവേഷമായാലും നെഗറ്റീവ് വേഷങ്ങളായാലും ഇണങ്ങുമെന്ന് തോന്നിയാല് ചെയ്യാന് യാതൊരു മടിയും ഇല്ലാത്ത താരം കൂടിയാണ് ലെന. ഇപ്പോള് തന്റെ ജീവിതത്തിലെ നിര്ണ്ണായമായ കുടുംബ ജീവിതത്തെ കുറിച്ച് മനസ് തുറക്കുകയാണ് താരം. ഒരു പരിധി വരെ സിനിമയില് ചെയ്യാറുള്ള അതേ ബോള്ഡായ തീരുമാനങ്ങള് മാത്രമെ ജീവിതത്തിലും കൈകൊണ്ടിട്ടൊള്ളൂവെന്നും ആ തീരുമാനങ്ങള് എന്നും തുണച്ചിട്ടേയുള്ളൂവെന്നും ലെന പറയുന്നു.
ഏറെ നാളത്തെ പ്രണയത്തിന് ശേഷം നടന്ന വിവാഹം, കുട്ടികള് വേണ്ടെന്ന തീരുമാനം, തുടര്ന്നുള്ള വിവാഹമോചനം എല്ലാം നിര്ണ്ണായകം തന്നെയായിരുന്നു. ആ തീരുമാനങ്ങള് നാളിത്രയും തെറ്റാണെന്ന ബോധ്യത്തിലേയ്ക്ക് എത്തിച്ചിട്ടില്ല. താനിനി ഒരു വിവാഹം കഴിക്കാനുള്ള സാധ്യതയുമില്ലെന്നും വിവാഹ ജീവിതത്തില് കുഞ്ഞുങ്ങള് വേണ്ട എന്ന തീരുമാനത്തില് ഇപ്പോള് സന്തോഷമുണ്ടെന്നും പറയുകയാണ് ലെന. ഒരു മാധ്യമത്തിന് നല്കിയ അഭിമുഖത്തിലാണ് വിവാഹത്തെക്കുറിച്ചും വിവാഹമോചനത്തെക്കുറിച്ചും ലെന മനസ് തുറന്നത്.
അഭിലാഷുമായി താനിപ്പോഴും സൗഹൃദത്തിലാണെന്നും ഒന്നിച്ച് സിനിമ ചെയ്യാനുള്ള ആലോചനയുണ്ടെന്നും ലെന വ്യക്തമാക്കി. ‘ആറാം ക്ലാസില് പഠിക്കുമ്പോഴാണ് ഞാനും അഭിലാഷും പരിചയപ്പെടുന്നത്. കല്യാണം കഴിച്ചത് 2004-ല് പിജി പൂര്ത്തിയാക്കിയ ശേഷവും. പലരുടെയും വിചാരം ഞങ്ങള് ലിവിങ് ടുഗെതര് ആയിരുന്നു എന്നാണ്. കുട്ടികള് വേണ്ടെന്നുള്ള ആ തീരുമാനത്തില് ഇപ്പോള് വളരെ സന്തോഷമുണ്ട്. രണ്ടുപേര് പരസ്പരം പറഞ്ഞ് സമ്മതിച്ച് പിരിയുന്നതില് കുഴപ്പമില്ല. കുട്ടികള് ഉണ്ടെങ്കില് വേര്പിരിയല് വലിയ തെറ്റാകും. ഇപ്പോഴും ഞങ്ങള് നല്ല സുഹൃത്തുക്കളാണ്.
ഒന്നിച്ച് സിനിമ ചെയ്യാനുള്ള ആലോചനയുമുണ്ട്. ജീവിതത്തില് തെറ്റും ശരിയും ഇല്ല, ട്രയല്സ് ആന്ഡ് ഇറേഴ്സ് അല്ലേ…ഒരു തീരുമാനത്തെ ഓര്ത്തും പശ്ചാത്താപമില്ല. അടുത്ത ചുവടിന് നിമിത്തമായ നല്ല തീരുമാനങ്ങളായിരുന്നു എല്ലാം. ഒരു തമാശയുള്ളത് ജാതകപ്രകാരം ഏഴരശ്ശനി തുടങ്ങിയ സമയത്തായിരുന്നു കല്യാണം. തീര്ന്ന സമയത്തു ഡിവോഴ്സ് ചെയ്തു ഇപ്പോള് കുറെ കാലമായി നല്ല സമയമാണ്. വരാനിരിക്കുന്നത് ഇതിനേക്കാള് നല്ല സമയവും. അതുകൊണ്ട് ഇനി ഒരിക്കലും വിവാഹം കഴിക്കാനുള്ള സാധ്യതയുമില്ല.’ ലെന പറയുന്നു.