ശ്രീജേഷിനെ രാജീവ് ഗാന്ധി ഖേല്‍രത്‌ന പുരസ്‌കാരത്തിന് ശുപാര്‍ശ ചെയ്ത ചെയ്ത് ഹോക്കി ഇന്ത്യ

ന്യൂഡല്‍ഹി: രാജ്യത്തെ പരമോന്നത കായിക ബഹുമതിയായ രാജീവ് ഗാന്ധി ഖേല്‍രത്‌ന പുരസ്‌കാരത്തിന് മലയാളിയും ഇന്ത്യന്‍ ഹോക്കി ടീമിന്റെ മുന്‍ നായകനുമായ പിആര്‍ ശ്രീജേഷിനെ ശുപാര്‍ശ ചെയ്തു. ശ്രീജേഷിന്റെ പേര് ശുപാര്‍ശ ചെയ്തത് ഹോക്കി ഇന്ത്യയാണ്. ചിംഗിള്‍സാന സിങ്, കങ്ഗുജാം, ആകാശ്ദീപ് സിങ്, വനിതാ താരം ദീപിക എന്നിവരെ അര്‍ജുന അവാര്‍ഡിനും ശുപാര്‍ശ ചെയ്തു. സമഗ്ര സംഭാവനയ്ക്കുള്ള മേജര്‍ ധ്യാന്‍ചന്ദ് പുരസ്‌കാരത്തിന് ഡോ. ആര്‍പി സിങ്, സന്ദീപ് കൗര്‍ എന്നിവരെയും പരിശീലകരായ ബല്‍ജീത് സിങ്, ബിഎസ് ജൗഹാന്‍, രമേഷ് പതാനിയ എന്നിവരെ ധ്രോണാചാര്യ പുരസ്‌കാരത്തിനും ശുപാര്‍ശ ചെയ്തിട്ടുണ്ട്. ഖേല്‍രത്‌ന പുരസ്‌കാരം നേടിയിട്ടുള്ള മലയാളികള്‍ അത്‌ലറ്റുകളായ കെഎം ബീനാമോള്‍, അഞ്ജു ബോബി ജോര്‍ജ് എന്നിവരാണ്.

ഇന്ത്യന്‍ ഹോക്കി ടീമിന്റെ മുന്‍ നായകന്‍ കൂടിയായ ശ്രീജേഷിനെ രാജ്യത്തെ ഏറ്റവും ഉയര്‍ന്ന കായിക പുരസ്‌കാരത്തിന് ശുപാര്‍ശ ചെയ്യാന്‍ ഹോക്കി ഇന്ത്യയെ പ്രേരിപ്പിച്ചത് വിവിധ ടൂര്‍ണമെന്റുകളില്‍ ഇന്ത്യന്‍ ടീമിനായി നടത്തിയ സ്ഥിരതയാര്‍ന്ന പ്രകടനമാണ്. റിയോ ഒളിംപിക്‌സിലടക്കം ഇന്ത്യന്‍ ടീമിനെ നയിച്ചത് ശ്രീജേഷ് ആണ്. ഇന്ത്യയെ ചരിത്രത്തിലാദ്യമായി ചാംപ്യന്‍സ് ട്രോഫിയില്‍ ഫൈനലിലെത്തിക്കുന്നതില്‍ ശ്രീജേഷ് നിര്‍ണായകപങ്ക് വഹിച്ചിട്ടുണ്ട്. 2014, 2018 ലോകകപ്പുകളിലും 2012, 2016 ഒളിംപിക്‌സുകളിലും ശ്രീജേഷ് ഇന്ത്യന്‍ ടീമിന്റെ ഭാഗമായിരുന്നു. 2015ല്‍ അര്‍ജുന അവാര്‍ഡും 2017ല്‍ രാജ്യത്തെ ഉയര്‍ന്ന നാലാമത്തെ സിവിലിയന്‍ ബഹുമതിയായ പത്മശ്രീയും ശ്രീജേഷ് നേടിയിട്ടുണ്ട്.

ഗോള്‍ പോസ്റ്റ് വീറോടെ കാത്ത ശ്രീജേഷിന്റെ മികവില്‍ക്കൂടിയാണ് ഹോക്കിയില്‍ രാജ്യാന്തരതലത്തില്‍ ഏറെ പിന്നാക്കം പോയ ഇന്ത്യ കഴിഞ്ഞ ഏതാനും വര്‍ഷത്തിനിടെ കരുത്തു വീണ്ടെടുത്തത്. ഫൈനലുകളിലെ ഷൂട്ടൗട്ടില്‍ ശ്രീജേഷിന്റെ മികവിലൂടെയായിരുന്നു 16 വര്‍ഷങ്ങള്‍ക്കുശേഷം 2014 ഏഷ്യന്‍ ഗെയിംസില്‍ ഇന്ത്യ സ്വര്‍ണം നേടിയതും 2011 ഏഷ്യന്‍ ചാംപ്യന്‍സ് ട്രോഫിയില്‍ ഇന്ത്യ ചാംപ്യന്‍മാരായതും. രണ്ടിലും ചിരവൈരികളായ പാകിസ്താനാണ് ശ്രീജേഷെന്ന കോട്ടയ്ക്കു മുന്നില്‍ തോറ്റുപോയത്.

ശ്രീജേഷിന്റെ നായകനായുള്ള അരങ്ങേറ്റം 2016ല്‍ ഇംഗ്ലണ്ടില്‍ നടന്ന ചാംപ്യന്‍സ് ട്രോഫിയിലായിരുന്നു. ചരിത്രത്തിലാദ്യമായി ടീമിന് വെള്ളി മെഡല്‍ നേട്ടം സമ്മാനിച്ച് ശ്രീജേഷ് ആ സ്ഥാനാരോഹണത്തെ ശരിവച്ചു. പിന്നാലെ ലോക ഹോക്കി ലീഗില്‍ രണ്ടാം സ്ഥാനം. പിന്നെ, റിയോ ഒളിംപിക്‌സില്‍ ക്വാര്‍ട്ടര്‍ പ്രവേശം. ഏഷ്യന്‍ ചാംപ്യന്‍സ് ട്രോഫി കിരീടം. മേയ് 10ന് ആരംഭിക്കുന്ന ഓസ്‌ട്രേലിയന്‍ പര്യടനത്തിനുള്ള ടീമിലും പ്രധാന ഗോള്‍കീപ്പര്‍ ശ്രീജേഷാണ്.