ലണ്ടന്: യുകെയില് ജോലി ചെയ്യുന്ന മലയാളി നഴ്സിന് രോഗിയുടെ കുത്തേറ്റു. മലയാളിയായ 57കാരി അച്ചാമ്മ ചെറിയാനാണ് ചികിത്സയിലുള്ളത്. ശനിയാഴ്ച രാത്രി മാഞ്ചസ്റ്ററിലെ റോയല് ഓള്ഡ്ഹാം എന്.എച്ച്.എസ് ആശുപത്രിയിലായിരുന്നു സംഭവം.
രണ്ട് കുട്ടികളുടെ അമ്മയായ അച്ചാമ്മ ചെറിയാന്റെ പരിക്കുകള് ഗുരുതരമാണെന്നും ചികിത്സ നല്കി വരികയാണെന്നും പൊലീസ് അറിയിച്ചിട്ടുണ്ട്. നഴ്സിനും അവരുടെ കുടുംബത്തിനും സഹപ്രവര്ത്തകര്ക്കും നിര്ണായക സമയത്ത് പിന്തുണ നല്കുന്നതിനാണ് മുന്ഗണന നല്കുന്നതെന്ന് സൂപ്രണ്ട് മാറ്റ് വാക്കറിനെ ഉദ്ധരിച്ച് ബിബിസി റിപ്പോര്ട്ട് ചെയ്തു.
നഴ്സിനെ കുത്തി പരിക്കേല്പ്പിച്ച റുമോണ് ഹഖ് എന്ന 37കാരനെ സംഭവ സ്ഥലത്തു വെച്ചുതന്നെ പൊലീസ് അറസ്റ്റ് ചെയ്തു. രാത്രി 11.30ന് ആശുപത്രിയില് ഏറെ തിരക്കുള്ള സമയത്ത് യുവാവിനെ പരിചരിക്കുന്നതിനിടെയായിരുന്നു ഇയാളുടെ ആക്രമണം.
അക്യൂട്ട് മെഡിക്കല് യൂണിറ്റില് വെച്ചായിരുന്നു സംഭവം. ആശുപത്രിയില് ശസ്ത്രക്രിയയ്ക്കായി ഉപയോഗിക്കുന്ന കത്രിക എടുത്താണ് ഇയാള് നഴ്സിന്റെ കഴുത്തിന് പിന്നില് കുത്തിയത്. സംഭവത്തിന് കാരണമായി പ്രകോപനമൊന്നും ഉണ്ടായിരുന്നില്ല. ആശുപത്രിയില് ദീര്ഘനേരം കാത്തിരിക്കേണ്ടി വന്നതിന്റെ ദേഷ്യത്തിലായിരുന്നു ആക്രമണെന്ന് കരുതുന്നതായി ചില റിപ്പോര്ട്ടുകള് പറയുന്നു. കഴിഞ്ഞ പത്ത് വര്ഷമായി അച്ചാമ്മ ചെറിയാന് ഇതേ ആശുപത്രിയില് ജോലി ചെയ്യുകയാണ്.
Discussion about this post