ബെയ്ജിംഗ്: തായ്വാനിലെ വിദേശ ഇടപെടലും വിഘടനവാദവും നേരിടാന് ബലപ്രയോഗത്തിനും മടിക്കില്ലെന്നു ചൈനീസ് പ്രസിഡന്റ് ഷി ചിന്പിംഗ്. തായ്വാന് ചൈനയുടെ ഭാഗമാണെന്നും തായ്വാന്-ചൈന പുനരേകീകരണം തടയാന് ഒരു ശക്തിക്കും സാധ്യമല്ലെന്നും ചിന്പിംഗ് പറഞ്ഞു.
തായ്വാനുമായി ബന്ധം മെച്ചപ്പെടുത്തുന്നതിനു ലക്ഷ്യമിട്ടു നടത്തിയ പ്രഖ്യാപനത്തിന്റെ 40-ാം വാര്ഷികം പ്രമാണിച്ചു ബെയ്ജിംഗിലെ ഗ്രേറ്റ് ഹാളില് സംഘടിപ്പിച്ച യോഗത്തിലാണു ചിന്പിംഗ് നിലപാടു വ്യക്തമാക്കിയത്. സമാധാനപരമായ പുനരേകീകരണമാണു ലക്ഷ്യമിടുന്നത്. ചൈനക്കാര് ചൈനക്കാരെ ആക്രമിക്കില്ല.
എന്നാല് ആവശ്യമെങ്കില് ബലപ്രയോഗത്തിനും മടിക്കില്ല. തായ്വാനില് ഇടപെടുന്ന വിദേശ ശക്തികളെയും അവിടെ പ്രവര്ത്തിക്കുന്ന വിഘടനവാദികളെയും ലക്ഷ്യമിട്ടായിരിക്കും ബലപ്രയോഗമെന്നും അദ്ദേഹം സൂചിപ്പിച്ചു. ചൈനാ വന്കരയിലും തായ്വാനിലുമുള്ള ജനങ്ങള് ഒരേ കുടുംബക്കാരാണ്. തായ്വാന് പ്രശ്നം ആഭ്യന്തരകാര്യമാണെന്നും ചര്ച്ചയിലൂടെ വേണം പരിഹാരം കാണേണ്ടതെന്നും ചിന്പിംഗ് പറഞ്ഞു.
ആഭ്യന്തരയുദ്ധത്തില് കമ്യൂണിസ്റ്റുകളുടെ കൈയില് നിന്നു പരാജയമേറ്റുവാങ്ങിയതിനെത്തുടര്ന്ന് 1949ല് ചൈനീസ് നാഷണലിസ്റ്റ് പാര്ട്ടിക്കാര് ചൈനാ വന്കരയില്നിന്ന് 160 കിലോമീറ്റര് അകലെയുള്ള തായ്വാനില് എത്തി സ്വന്തം സര്ക്കാര് രൂപീകരിക്കുകയായിരുന്നു.
ചിന്പിംഗിന്റെ പുനരേകീകരണ ആഹ്വാനം തായ്വാന് പ്രസിഡന്റ് സായ് ഇംഗ്വെന് തള്ളിക്കളഞ്ഞു. ഒരു രാജ്യം രണ്ടു ഭരണസന്പ്രദായം എന്ന ചിന്പിംഗിന്റെ നയം അംഗീകരിക്കാന് തയാറല്ലെന്നും അവര് പറഞ്ഞു. അടുത്തയിടെ ഹോങ്കോംഗ് ചൈനീസ് നിയന്ത്രണത്തില് വന്നപ്പോള് സ്വീകരിച്ച രീതിയാണിത്. ഇതനുസരിച്ച് ഹോങ്കോംഗിന് പരിമിത തോതില് സ്വയംഭരണം അനുവദിക്കുകയുണ്ടായി.
Discussion about this post