ലണ്ടന്: കേന്ദ്ര സര്ക്കാരിന്റെ കാര്ഷിക നിയമത്തിനെതിരെ ലണ്ടനിലും വന് പ്രതിഷേധം. സമരം ചെയ്യുന്ന കര്ഷകര്ക്ക് ഐക്യദാര്ഢ്യം പ്രഖ്യാപിച്ചുകൊണ്ട് ആയിരക്കണക്കിന് ആളുകളാണ് ഞായറാഴ്ച മധ്യ ലണ്ടനില് പ്രതിഷേധിച്ചത്. ഓള്ഡ്വിച്ചില് സ്ഥിതിചെയ്യുന്ന ഇന്ത്യന് എംബസിക്ക് സമീപം ഒത്തുകൂടിയ പ്രതിഷേധക്കാര് ട്രാഫല്ഗര് ചത്വരത്തിലേക്കാണ് പ്രകടനം നടത്തിയത്.
‘ഞങ്ങള് പഞ്ചാബിലെ കര്ഷകര്ക്കൊപ്പം നില്ക്കുന്നു’, കര്ഷകര്ക്ക് നീതി വേണം എന്നീ മുദ്രാവാക്യവും പ്ലക്കാര്ഡുകളും ഉയര്ത്തിയാണ് ബ്രിട്ടനിലെ സിഖുകാര് അടക്കമുള്ളവരുടെ പ്രതിഷേധം.
അതേസമയം കൊവിഡ് മാര്ഗനിര്ദേശങ്ങള് ലംഘിച്ചെന്ന് ചൂണ്ടിക്കാണിച്ച് ഒട്ടേറെ പേരെ പോലീസ് അറസ്റ്റ് ചെയ്തുവെന്ന് വാര്ത്താ ഏജന്സിസായ പിടിഐ റിപ്പോര്ട്ട് ചെയ്തിരിക്കുന്നത്. കര്ശനമായ കൊവിഡ് നിയന്ത്രണങ്ങള് നിലവിലുണ്ടെന്നും അതിനാല് 30ല് അധികം പേര് ഒത്തുകൂടിയാല് അറസ്റ്റും പിഴയും ഉണ്ടാകുമെന്ന് പോലീസ് പ്രതിഷേധക്കാര്ക്ക് മുന്നറിയിപ്പ് നല്കിയിരുന്നു. എന്നാല് ആയിരക്കണക്കിന് പേരാണ് ഒത്തുചേര്ന്നത്. ഇതേ തുടര്ന്നാണ് പോലീസ് പ്രതിഷേധക്കാരെ അറസ്റ്റ് ചെയ്തത്.
അതേസമയം ഇന്ത്യന് ഹൈക്കമ്മീഷന് ബന്ധപ്പെട്ട അധികാരികളുമായി പ്രവര്ത്തനങ്ങള് ഏകോപിപ്പിക്കുന്നുണ്ടെന്നാണ് ഹൈക്കമ്മീഷന് വക്താവിനെ ഉദ്ധരിച്ച് പിടിഐ റിപ്പോര്ട്ട് ചെയ്തിരിക്കുന്നത്. പ്രത്യേക അനുമതിയില്ലാതെ ആയിരങ്ങളുടെ ഈ ഒത്തുചേരല് എങ്ങനെ നടന്നുവെന്നത് അടക്കമുള്ള പ്രശ്നങ്ങളെ അവരുമായി ചേര്ന്ന് നേരിടുമെന്നും അദ്ദേഹം പറഞ്ഞു.
എന്നാല് ഈ പ്രതിഷേധത്തിന് പിന്നില് ഇന്ത്യാ വിരുദ്ധ വിഘടനവാദികളാണെന്നാണ് ആരോപണം. ഇന്ത്യയിലെ കര്ഷക പ്രതിഷേധം അവസരമായി ഉപയോഗിച്ച ഇന്ത്യാ വിരുദ്ധ വിഘടനവാദികളാണ് പ്രതിഷേധത്തിന് നേതൃത്വം നല്കിയതെന്നാണ് ് ഹൈക്കമ്മീഷന് വക്താവിന്റെ ആരോപണം. ഇന്ത്യയിലെ കര്ഷകരെ പ്രത്യക്ഷത്തില് പിന്തുണച്ചുകൊണ്ട് അവര് ഇന്ത്യാ വിരുദ്ധ അജണ്ട പിന്തുടരാനുള്ള അവസരമായി ഉപയോഗിച്ചുവെന്നും അദ്ദേഹം ആരോപിച്ചു.
Discussion about this post