ന്യൂഡല്ഹി: ‘ആരുടേയും രാഷ്ട്രീയം നോക്കാതെ ആഗോളനയങ്ങള് സ്വീകരിക്കുകയാണ് ചെയ്യുന്നത്’ കഴിഞ്ഞ ദിവസമായി തിരിയുന്ന ആരോപണങ്ങളില് ഫേസ്ബുക്ക് നല്കുന്ന മറുപടി ഇപ്രകാരമാണ്. വിദ്വേഷ പ്രസംഗങ്ങളെ എതിര്ക്കുന്നുവെന്നും ഫേസ്ബുക്ക് ഔദ്യോഗിക വക്താവ് അറിയിക്കുന്നു.
ഭരണകക്ഷിയായ ബിജെപിയുമായി ബന്ധപ്പെട്ട് പ്രവര്ത്തിക്കുന്ന നേതാക്കള് നടത്തുന്ന വിദ്വേഷപ്രസംഗങ്ങള്ക്ക് സാമൂഹ്യമാധ്യമങ്ങള് ഇടമൊരുക്കുന്നെന്ന വാദത്തിനോട് പ്രതികരിക്കുകയായിരുന്നു അദ്ദേഹം. ‘അക്രമത്തെയും വിദ്വേഷ പ്രസംഗത്തെയും ഞങ്ങള് ശക്തമായി പ്രതിരോധിക്കുന്നു. ഞങ്ങള് ഈ നയം സ്വീകരിച്ചിരിക്കുന്നത് ആഗോളമായാണ്. അത് ആരുടെയും രാഷ്ട്രീയം നോക്കിയിട്ടില്ല,’ ഫേസ്ബുക്ക് വക്താവ് പറഞ്ഞു.
ഇതില് ഇനിയും കൂടുതല് കാര്യങ്ങള് ചെയ്യേണ്ടതുണ്ടെന്നും കൃത്യത ഉറപ്പുവരുത്താന് നിരന്തരം ശ്രമിക്കുന്നുണ്ടെന്നും അദ്ദേഹം കൂട്ടിച്ചേര്ത്തു. കഴിഞ്ഞ വെള്ളിയാഴ്ച അന്താരാഷ്ട്ര മാധ്യമമായ വാള്സ്ട്രീറ്റ് ജേര്ണലിലാണ് ഇന്ത്യയിലെ ഫേസ്ബുക്ക് പക്ഷപാതിത്വത്തോടെയാണ് പ്രവര്ത്തിക്കുന്നതെന്ന് റിപ്പോര്ട്ട് ചെയ്തത്. ഫേസ്ബുക്കിന്റെ വിദ്വേഷ പ്രസംഗത്തിനെതിരെയുള്ള നയങ്ങളെ അവഗണിച്ച് കൊണ്ട് മുസ്ലിം വിരുദ്ധത പറയാന് ഫേസ്ബുക്കില് അനുവദിക്കുന്നുണ്ടെന്നും റിപ്പോര്ട്ടിലുണ്ട്.
ഇന്ത്യയിലെ ഫേസ്ബുക്കിന്റെ ഉന്നത എക്സിക്യൂട്ടീവ് അങ്കി ദാസ് ഭരണകക്ഷിയായ ബിജെപി അംഗങ്ങള്ക്ക് വേണ്ടി വിദ്വേഷ പ്രസംഗ പോസ്റ്റുകളില് നടപടിയെടുക്കാനുള്ള മാനദണ്ഡങ്ങള് മാറ്റുന്നുവെന്നും ആരോപിക്കുന്നു. ഇതിനെ ആയുധമാക്കി കോണ്ഗ്രസും രംഗത്തെത്തിയിരുന്നു. പിന്നാലെയാണ് വിശദീകരണവുമായി ഫേസ്ബുക്കും രംഗത്തെത്തിയത്.
Discussion about this post