തിരുവനന്തപുരം: അഞ്ച് വയസിന് താഴെയുള്ള കുഞ്ഞുങ്ങള്ക്ക് ഇന്ന് പോളിയോ തുള്ളിമരുന്ന് നല്കും. ഇടുക്കി ഒഴികെയുളള 13 ജില്ലകളില് ഇന്ന് കുഞ്ഞുങ്ങള്ക്ക് പോളിയോ നല്കുന്നത്. ട്രാന്സിറ്റ്, മൊബൈല് ബൂത്തുകള് ഉള്പ്പെടെ 22,383 ബൂത്തുകളാണ് പ്രവര്ത്തിക്കുക. പോളിയോ വൈറസ് നിര്മ്മാര്ജ്ജനം ലക്ഷ്യമിട്ടു നടത്തുന്ന പള്സ് പോളിയോ ഇമ്മ്യൂണൈസേഷന് പരിപാടിയാണ് ഇന്ന് നടക്കുന്നത്.
അഞ്ച് വയസിന് താഴെയുളള 21,11,010 കുഞ്ഞുങ്ങള്ക്ക് പ്രത്യേകം സജ്ജീകരിച്ച ബൂത്തുകള് വഴി തുള്ളി മരുന്ന് നല്കാനാണ് ലക്ഷ്യമിടുന്നത്. 44,766 വോളണ്ടിയര്മാര് ബൂത്ത് പ്രവര്ത്തനങ്ങള്ക്ക് നേതൃത്വം നല്കും.
ആശാ, അങ്കണവാടി, കുടുംബശ്രീ പ്രവര്ത്തകര്, മറ്റു സന്നദ്ധ പ്രവര്ത്തകര് എന്നിവരാണ് ആരോഗ്യപ്രവത്തകര്ക്കു പുറമെ ബൂത്തുകളില് ഉണ്ടാവുക. സ്കൂളുകള്, അങ്കണവാടികള്, വായനശാലകള്, സര്ക്കാര് ആരോഗ്യ സ്ഥാപനങ്ങള്, സ്വകാര്യ ആശുപത്രികള് എന്നിവിടങ്ങളിലെ ബൂത്തുകള് ഇന്ന് രാവിലെ 8 മുതല് വൈകുന്നേരം അഞ്ച് മണി വരെ പ്രവര്ത്തിക്കും.
ബസ് സ്റ്റാന്റുകള്, റെയില്വേ സ്റ്റേഷനുകള്, വിമാനത്താവളങ്ങള്, ബോട്ടു ജെട്ടികള് എന്നിവിടങ്ങളിലെ ട്രാന്സിറ്റ് ബൂത്തുകള് ഒക്ടോബര് 12, 13, 14 തീയതികളില് വൈകിട്ട് 8 മണി വരെ പ്രവര്ത്തിക്കും. അതിഥി തൊഴിലാളികളുടെ ക്യാമ്പുകള്, വിനോദ സഞ്ചാര കേന്ദ്രങ്ങള് എന്നിവിടങ്ങളിലെ മൊബൈല് ബൂത്തുകളും ഒക്ടോബര് 12 ,13, 14 തീയതികളില് പ്രവര്ത്തിക്കും.
ഒക്ടോബര് 12-ന് ബൂത്തുകളില് തുള്ളിമരുന്ന് നല്കാന് കഴിയാത്ത കുഞ്ഞുങ്ങള്ക്ക് ഒക്ടോബര് 13, 14 തീയതികളില് വോളണ്ടിയര്മാര് വീടുകളില് എത്തി തുള്ളിമരുന്ന് നല്കും. തദ്ദേശസ്വയംഭരണം, വനിതാ ശിശുവികസനം തുടങ്ങിയ വകുപ്പുകള്, റോട്ടറി ഇന്റര്നാഷണല്, മറ്റു സന്നദ്ധ സംഘടനകള് എന്നിവയുടെ സഹകരണത്തോടെയാണ് പരിപാടി സംഘടിപ്പിക്കുന്നത്.
Discussion about this post