എറണാകുളം: എറണാകുളം പുത്തന്കുരിശ് മലേക്കുരിശില് വീട് സ്വകാര്യ ബാങ്ക് ജപ്തി ചെയ്തതോടെ പെരുവഴിയിലായ കുടുംബത്തിന് ആശ്വാസം. ബാങ്കില് പലിശയടക്കമുള്ള മുഴുവന് തുകയും നല്കാമെന്ന് പ്രവാസി സുഹൃത്ത് അറിയിച്ചതായി മുന് എംഎല്എ വിപി സജീന്ദ്രന് അറിയിച്ചു.
വീട് ജപ്തി ചെയ്തതോടെ കൈക്കുഞ്ഞുമായി പെരുവഴിയിലാകുകയായിരുന്നു സ്വാതിയും കുടുംബവും. 2019ല് സ്വാതി മണപ്പുറം ഫിനാന്സില് നിന്ന് അഞ്ച് ലക്ഷം രൂപ വായ്പ എടുത്തിരുന്നു. ഇതില് 3.95 ലക്ഷം തിരിച്ചടിച്ചു. പിന്നീട് ഗര്ഭിണിയായതോടെ തിരിച്ചടവ് മുടങ്ങി. ഗഡുക്കളായി അടയ്ക്കാമെന്ന് അറിയിച്ചെങ്കിലും തുക ഒന്നിച്ചടക്കണമെന്ന് ബാങ്ക് നിലപാടെടുക്കുകയായിരുന്നെന്ന് സ്വാതി പറഞ്ഞു.
പലിശ ഉള്പ്പടെ അഞ്ച് ലക്ഷം രൂപ ഒറ്റ തവണയായി അടക്കണമെന്നാണ് ബാങ്ക് ആവശ്യപ്പെട്ടതെന്നും കുടുംബം പറഞ്ഞു. കുന്നത്തുനാട് എംഎല്എ സ്ഥലത്തെത്തി ബാങ്കുമായി സംസാരിച്ച് രാത്രി വൈകി വീട് തുറന്നുനല്കിയിരുന്നെങ്കിലും വീടിനുള്ളിലേക്ക് കയറിയാല് അതിക്രമിച്ചു കയറിയതിന് കേസ് കൊടുക്കും എന്നായിരുന്നു ബാങ്കിന്റെ ഭീഷണി.
Discussion about this post