തിരുവനന്തപുരം: വധശിക്ഷയ്ക്ക് വിധിക്കപ്പെട്ട് യെമനിലെ ജയിലില് കഴിയുന്ന മലയാളി നഴ്സ് നിമിഷ പ്രിയയുടെ മോചനദ്രവ്യത്തിനെന്ന പേരില് വ്യാജപണപ്പിരിവ് നടത്തുന്നു എന്നാരോപിച്ച് ഇവാഞ്ചലിസ്റ്റും ഗ്ലോബല് പീസ് ഇനിഷ്യേറ്റീവ് സ്ഥാപകനുമായ കെഎ പോളിനെതിരെ നിമിഷ പ്രിയ ആക്ഷന് കമ്മിറ്റി മുഖ്യമന്ത്രിക്ക് പരാതി നല്കി.
ആക്ഷന് കൗണ്സില് ലീഗല് അഡൈ്വസറും സുപ്രീം കോടതി അഭിഭാഷകനുമായ അഡ്വ.സുഭാഷ് ചന്ദ്രനാണ് മുഖ്യമന്ത്രിക്ക് പരാതി നല്കിയത്.
നിമിഷപ്രിയയുടെ മോചനത്തിന് ആവശ്യമായ തുക ഇന്ത്യന് ഗവണ്മെന്റ് ആരംഭിച്ച വിദേശ കാര്യമന്ത്രാലയത്തിന്റെ ബാങ്ക് അക്കൗണ്ടിലേക്ക് സംഭാവന ചെയ്യണമെന്ന് കാണിച്ച് ചൊവ്വാഴ്ച കെഎ പോളിന്റെ എക്സ് അക്കൗണ്ടില് നിന്നും പോസ്റ്റ് വന്നിരുന്നു.
8.3 കോടി രൂപ വേണമെന്നാണ് പോസ്റ്റില് ആവശ്യപ്പെട്ടിരുന്നത്. ഇതു വ്യാജമാണെന്ന് കേന്ദ്ര വിദേശകാര്യ മന്ത്രാലയം തന്നെ വ്യക്തമാക്കിയിരുന്നു.
എന്നാല് നിമിഷപ്രിയയുടെ പേരില് കോടികള് പിരിച്ചെടുക്കാനുള്ള ശ്രമമാണ് പോള് നടത്തുന്നതെന്നും കേന്ദ്രസര്ക്കാരിന്റെ അക്കൗണ്ടിലേക്ക് എന്ന വ്യാജേന പണം പിരിക്കാന് ശ്രമിച്ച പോളിനെതിരെ നിയമ നടപടികള് സ്വീകരിക്കണമെന്നും പരാതിയില് ആവശ്യപ്പെടുന്നു.
Discussion about this post