തൃശ്ശൂര്: മതിലകത്ത് മാല കൊത്തിക്കൊണ്ട് പൊയ കാക്കയെ പിറകെ ഓടി എറിഞ്ഞ് വീഴ്ത്തി നാട്ടുകാര്. കുടുക്കവളവ് പതിമൂന്നാം വാര്ഡിലെ 77-ാം നമ്പര് ശിശുഭവന് അംഗണ്വാടി ജീവനക്കാരി ഷെര്ളി തോമസിന്റെ മൂന്നര പവന്റെ സ്വര്ണ മാലയാണ് അംഗണവാടിയുടെ കോണിപ്പടിയിലിരുന്ന കാക്ക കൊത്തിയെടുത്ത് പാറിയത്.
രാവിലെ അംഗണ്വാടി വൃത്തിയാക്കുമ്പോള് മാല ചൂലില് കുടുങ്ങിയിരുന്നു. ഇതിനെ തുടര്ന്ന് കോണിപ്പടിയില് മാല ഊരിവെച്ചു. മാലയ്ക്കൊപ്പം ഒരു ഭക്ഷണപ്പൊതിയും ഉണ്ടായിരുന്നു. ഭക്ഷണം കൊത്തിയെടുക്കാന് വന്ന കാക്ക മാലയും കൊത്തിയാണ് പറന്നത്.
മാല കാക്ക കൊണ്ടു പോകുന്നത് കണ്ടതോടെ ഷേര്ളി ബഹളം വയ്ക്കുകയും ഇതുകേട്ട നാട്ടുകാര് കാക്കയുടെ പിന്നാലെ ഓടുകയും ചെയ്തു. എന്നാല്, പുഞ്ചപ്പാടവും കാടും തോടും നിറഞ്ഞ പ്രദേശത്തേക്കായിരുന്നു കാക്ക മാലയും കൊണ്ട് പറന്നത്. എങ്കിലും തൊട്ടടുത്ത മരത്തില് ഇരുന്നത് രക്ഷയായി. പിന്നാലെ ഓടിയ നാട്ടുകാരിലൊരാള് കാക്കയെ ഉന്നം നോക്കി എറിഞ്ഞതോടെ, അതിന്റെ കൊക്കില് നിന്നും മാല താഴേക്ക് വീണു.
Discussion about this post