തിരുവനന്തപുരം: സംസ്ഥാനത്ത് വ്യാപകമായി ശക്തമായ മഴ തുടരുന്നു. ന്യൂനമര്ദ്ദത്തിന്റെ സ്വാധീനഫലമായിട്ടാണ് മഴ ലഭിക്കുക. അതേസമയം, നേരത്തെയുള്ള മുന്നറിയിപ്പില് മാറ്റം വരുത്തി.
ഇന്ന് ഒന്പത് ജില്ലകളില് ഒറ്റപ്പെട്ട സ്ഥലങ്ങളില് തീവ്രമഴയാണ് കേന്ദ്ര കാലാവസ്ഥ വകുപ്പ് പ്രവചിക്കുന്നത്. ഈ ജില്ലകളിൽ ഓറഞ്ച് അലേർട്ട് പ്രഖ്യാപിച്ചു. നേരത്തെ ഏഴു ജില്ലകളിലാണ് ഓറഞ്ച് അലേർട്ട്.
പത്തനംതിട്ട, കോട്ടയം, എറണാകുളം, ഇടുക്കി, തൃശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളില് ഇന്ന് തീവ്രമഴയ്ക്ക് സാധ്യതയുണ്ടെന്നാണ് കാലാവസ്ഥ വകുപ്പിന്റെ പ്രവചനത്തില് പറയുന്നത്.
ഓറഞ്ച് അലര്ട്ട് ഇല്ലാത്ത ജില്ലകളില് ശക്തമായ മഴയാണ് പ്രവചിക്കുന്നത്. ജാഗ്രതയുടെ ഭാഗമായി ഈ ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. ഞായറാഴ്ച തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ഒഴികെയുള്ള എല്ലാ ജില്ലകളിലും മുന്നറിയിപ്പ് ഉണ്ട്. ജാഗ്രതയുടെ ഭാഗമായി 9 ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്.
ഗുജറാത്ത് തീരം മുതല് വടക്കന് കേരള തീരം വരെ തീരത്തോട് ചേര്ന്ന് ന്യൂനമര്ദ്ദപാത്തി സ്ഥിതിചെയ്യുന്നുണ്ട്. വടക്കന് ഛത്തീസ്ഗഡിനും ഝാര്ഖണ്ഡിനും മുകളിലായി തീവ്രന്യൂനമര്ദ്ദം സ്ഥിതിചെയ്യുന്നു.
നാളെയോടെ ശക്തി കൂടിയ ന്യൂനമര്ദ്ദമായി മാറാന് സാധ്യതയെന്നും കേന്ദ്ര കാലാവസ്ഥ വകുപ്പ് അറിയിച്ചു. ഇതിന്റെയെല്ലാം സ്വാധീനഫലമായാണ് സംസ്ഥാനത്ത് മഴ ലഭിക്കുന്നത്.
Discussion about this post