കൊച്ചി: കൊച്ചിയില്‍ കുസാറ്റ് പരിസരത്തെ സ്വകാര്യ ഹോസ്റ്റലുകളിലും പിജി കളിലും പോലീസിന്റെ മിന്നല്‍ പരിശോധന. ഹോസ്റ്റലുകളില്‍ നിന്ന് ചെറിയ അളവില്‍ കഞ്ചാവ് കണ്ടെത്തി. കുസാറ്റ് പരിസരത്തെ തമീം ഹോസ്റ്റലില്‍ നടത്തിയ പരിശോധനയിലാണ് രണ്ട് ഗ്രാം കഞ്ചാവ് പിടിച്ചെടുത്തത്.
സംഭവത്തില്‍ കൊല്ലം സ്വദേശിയായ വിദ്യാര്‍ത്ഥി മുഹമ്മദ് സൈദലിയെ പോലീസ് കസ്റ്റഡിയിലെടുത്തു. ഭാരത് മാതാ കോളേജിലെ രണ്ടാം വര്‍ഷ വിദ്യാര്‍ത്ഥിയാണ്. കസ്റ്റഡിയിലെടുത്ത യുവാവിനെ രാത്രി തന്നെ പോലീസ് സ്റ്റേഷന്‍ ജാമ്യത്തില്‍ വിട്ടയച്ചു.
പരിശോധനയുടെ ഭാഗമായി മദ്യപിച്ച് വാഹനമോടിച്ചവരെയും പോലീസ് പിടികൂടി. കുസാറ്റിലെ തമീം ഹോസ്റ്റല്‍ സ്ഥിരം ലഹരി കേന്ദ്രമാണെന്നും ഇവിടെ നിന്ന് കഞ്ചാവ് വലിക്കുന്ന ഉപകരണങ്ങളടക്കം പിടിച്ചെടുത്തുവെന്നും പോലീസ് പറഞ്ഞു.
ഹോസ്റ്റലിലെ മുറിയില്‍ പരിശോധനയ്‌ക്കെത്തിയ പോലീസ് കണ്ടത് നിറയെ മദ്യക്കുപ്പികളായിരുന്നു. വന്‍തോതില്‍ ബിയര്‍ ബോട്ടിലുകളും മദ്യക്കുപ്പികളുമാണ് കണ്ടെടുത്തത്. ഇതിനുപുറമെ ലഹരിവസ്തുക്കളുടെ പാക്കറ്റുകളും സിഗരറ്റ് പാക്കറ്റുകളും വന്‍തോതില്‍ കണ്ടെത്തി.
Discussion about this post