ചെന്നൈ: ഇന്ത്യയിലെ ഏറെ ഫോളോവേഴ്സുള്ള യൂടുബ് ചാനലാണ് തമിഴ്നാട്ടില് നിന്നുള്ള വില്ലേജ് കുക്കിങ് ചാനല്. മുത്തശ്ശനും പേരമക്കളുമാണ് ചാനലിലുള്ളവര്. വ്യത്യസ്തമായ ഭക്ഷണ സാധനങ്ങള് ഒരുക്കിയാണ് ചാനല് ശ്രദ്ധേയമാകുന്നത്.
വില്ലേജ് കുക്കിങ് ചാനലിന്റെ ആരാധകനായിരിക്കുകയാണ് നടന് ചിരഞ്ജീവി. മകളുടെ നിര്ദേശ പ്രകാരം ഒരുക്കല് താന് അവരുടെ വീഡിയോ കണ്ടെന്നും അത് ഇഷ്ടപ്പെട്ടുവെന്നും ചിരഞ്ജീവി പറയുന്നു. വില്ലേജ് കുക്കിങ് ചാനലിന്റെ വ്യത്യസ്തമായ അവതരണ രീതി തന്നെ ആകര്ഷിച്ചതായും ചിരഞ്ജീവി പറഞ്ഞു. ചിരഞ്ജീവിയുടെ വാക്കുകള്ക്ക് ചാനലിന്റെ അഡ്മിന് നന്ദിയും രേഖപ്പെടുത്തിയിട്ടുണ്ട്.
‘മകളില് നിന്നാണ് വില്ലേജ് കുക്കിങ് ചാനലിനെക്കുറിച്ച് അറിഞ്ഞത്. ഓഡിറ്റര്മാരും അഭിഭാഷകരും പങ്കെടുത്ത ഒരു മീറ്റിങ്ങിനിടെയാണ് വീഡിയോ കാണാന് ഇടയായത്. ‘എല്ലോരും വാങ്കാ, ആള്വെയ്സ് വെല്ക്കംസ് യൂ’ എന്ന അവരുടെ സ്വാഗത വാചകം എന്നെ ഒരുപാട് ആകര്ഷിച്ചു. എന്റെ ശ്രദ്ധ മുഴുവനും പിന്നീട് മീറ്റിങ്ങിലായിരുന്നില്ല, ഇവരുടെ വീഡിയോയിലായിരുന്നു. ഞാന് ഫോണില് നോക്കിയിരിക്കുന്നത് കണ്ട ടീം അംഗങ്ങള് കരുതിയത് ഞാന് അവര് പറയുന്നത് കുറിക്കുകയാണ് എന്നാണ്, ചിരഞ്ജീവി പറഞ്ഞു.
2.4 കോടി ഫോളോവേഴ്സുള്ള യൂട്യൂബ് ചാനലാണ് വില്ലേജ് കുക്കിങ് ചാനല്. കഴിഞ്ഞ ദിവസം ചാനലിലെ പ്രധാന ആകര്ഷണമായ എം പെരിയതമ്പിയെ ആശുപത്രിയില് പ്രവേശിപ്പിച്ചിരുന്നു. ഹൃദയസംബന്ധമായ അസുഖത്തെ തുടര്ന്ന് മാര്ച്ച് 28ന് അദ്ദേഹത്തെ ആശുപത്രിയില് പ്രവേശിപ്പിച്ചിരിക്കുകയാണെന്നും സുഖം പ്രാപിച്ച് വരികയാണെന്നും പെരിയതമ്പിയുടെ കൊച്ചുമകന് സുബ്രമണ്യന് സോഷ്യല് മീഡിയയിലൂടെ അറിയിച്ചിരുന്നു.
Discussion about this post